Shpërdoron Luftëtari, Laçi merr pikë në Gjirokastër
Bluzinjtë bëjnë "vetëvrasje", vijojnë të humbasin shumë raste
Gol në start dhe në limit, por në Gjirokastër nuk ka fitues, edhe pse luhet një ndeshje mjaft e luftuar dhe e hapur deri në sekondat e fundit. Luftëtari shpërdoron një mundësi të artë për të bërë kthesën, ndërsa Laçi tregon se është jo më kot në pozita komode në klasifikim. Shpërdorimi i rasteve vijon të mbetet një gangrenë për bluzinjtë e Hasan Likës, që, edhe pse luajnë mirë, nuk shfrytëzojnë në maksimum atë që krijojnë. Portierët e dy skuadrave, Ruçi dhe Selmani, kanë pasur jo pak punë, teksa me pritjet e tyre evituan gola të sigurt. Barazimi kënaqi më shumë Laçin e Mezanit, ndërsa gjirokastritët u dëshpëruan.
PJESA E PARË - Ndeshja nis me gol dhe çfarë... goli. Bregu "shpik" një asist fantastik duke nxjerrë të lirë Abazajn, me këtë të fundit që mposht Selmanin që në minutën e 2-të. Fillim më të mirë se ky nuk mund të kishte për bluzinjtë. Megjithatë, me kalimin e minutave loja ekuilibrohet, pasi Laçi shtyn përpara. Uzuni, Nika dhe Rexhinaldo janë gjithnjë të rrezikshëm. Nika krijon iluzionin e barazimit me një goditje diagonale, por Ruçi i thotë "jo" golit. Rastin më të mirë për të dyfishuar shifrat e ka fantazisti Rroca, por edhe pse vrapon rreth 40 metra deri te porta, në momentin e fundit shpërdoron. Pavarësisht përpjekjeve të Laçit, pjesa e parë mbyllet me fitoren e bluzinjve.
PJESA E DYTË - Pas pushimit, skuadrat e nisin me të njëjtat formacione. Laçi është më kërkues, por rastin e parë e ka Bregu, që me një goditje fluturimthi, nuk gjen dot kuadratin. Kundërpërgjigjet Rexhinaldo, i cili debutoi në Kategorinë Superiore si pjesë e Luftëtarit në sezonin e kaluar, por nuk ka shënjestrën e duhur. Për shumë minuta loja ka shumë ndalesa, me faulle të shpeshtë nga të dyja skuadrat. Gjyqtari Xhaja kursen kartonët, duke administruar ndeshjen me këshilla për lojtarët. Mbrojtësi Gjoni ka një shans të artë, por goditja me kokë grushtohet nga Ruçi. Më pas vjen rasti i ndeshjes, ku Lamçe jep një asist për Bregun, që i vetëm me Selmanin, nuk e dërgon dot topin në rrjetë. Këtu merr kthesë loja dhe Laçi bëhet i frikshëm në 15 minutat e fundit. Duke mos pasur çfarë të humbë, Mezani hedh skuadrën në sulm, teksa aktivizon
edhe Xhixhën. Insistimi i kurbinasve shpërblehet vetëm në limitin e takimit, kur Gjoni jep leksione goli për sulmuesit. Pesë minutat shtesë nuk sjellin ndryshime dhe gjithçka mbyllet 1-1 pas një goditjeje të Abazajt, që neutralizohet mrekullisht nga Selmani.