“Kemi nevojë për merkato, e kalojmë Dinamon”
Besëlidhja luan këtë fundjavë në kryeqytet, Spartak Ajazi: Në Tiranë kërkojmë vazhdimësinë
Besëlidhja ka nisur javën stërvitore, . nën drejtimin teknik të Gledis Lanit, në kuadër të javës së nëntë ose të fundit për fazën e parë të kampionatit. Sfida e radhës do të jetë në Tiranë kundër Dinamos. Pas fitores së pastër 3- 0 të shtunën në shtëpi ndaj Korabit, lezhjanët e Besëlidhjes tashmë janë rikthyer në vendin e dytë, çka përbën një kërcënim real për Kastriotin kryesues. Të shtunën ndaj Korabit, Besëlidhja bëri detyrën, njëkohësisht edhe autokritikën reale për atë çka pësoi dy javë më parë në Krujë që solli dhe dorëheqjen e trajnerit Anteu Pepaj. Në fitoren ndaj Korabit, përveç grupit, një ndihmesë të jashtëzakonshme dha sulmuesi Spartak Ajazi.
Sulmuesi - Ky i fundit, me dy golat e tij në një hark kohor prej 3 minutash në portën dibrane, u ngjit në kuotën e 5 golave, ndonëse ka lozur vetëm 4 ndeshje si titullar për arsye dëmtimi. Në një prononcim për "Panorama Sport", sulmuesi Ajazi u shpreh se sfida e radhës është e kalueshme për Besëlidhjen. "Pa dyshim që shënimi i golit e ka kënaqësinë e ligjshme, ndonëse pozicioni në të cilin luaj unë e ka detyrim dhe kjo të gëzon dyfish duke mos e shpërdoruar besimin e kolegëve. Duke e ditur se Korabi është një skuadër që vjen nga Kategoria Superiore dhe për pasojë e kërkon rikthimin atje, ne shfrytëzuam pushimin e javës së shkuar për të marrë ngarkesat maksimale nga të gjitha pikëpamjet dhe kjo u shpërblye me një fitore të thellë dhe të pastër. Tashmë jemi të përqendruar në sfidën e ardhshme që do ta luajmë në Tiranë ndaj Dinamos. Një ndeshje që nuk është e lehtë, por për Besëlidhjen besoj se do të jetë e kalueshme. Skuadra ka nevojë për rifreskim në disa sektorë dhe besoj se merkato dimërore do ta plotësojë këtë mangësi. Kalendari është treguar i pamëshirshëm për ne, pasi tani do të luajmë tri sfida në transfertë. Gjithsesi, e theksoj që momentalisht po mendojmë vetëm për sfidën ndaj Dinamos në kryeqytet, pasi duke i marrë radhazi ndeshjet, ecuria është edhe më e suksesshme. Golat ua dedikoj familjarëve, kolegëve dhe stafit", përfundoi sulmuesi i Besëlidhjes, Spartak Ajazi. Preng Gjikola