"Bufon idhulli i një jete, nuk më tremb trashëgimia e tij"

Në një intervistë për faqen zyrtare të UEFA-s, Xhanluxhi Donaruma ka folur për Milanin, Italinë dhe trashëgiminë e Xhixhi Bufon në portën e kombëtares "axurre". Vetë numri 1 i Juventusit përmendi Xhixhon dhe Matia Perinin si pasardhës, me gardianin kuqezi që nuk i trembet përgjegjësisë: "Nuk kam frikë dhe jam i vetëdijshëm se, për të arritur nivelin e dikujt si Bufon, më duhet ende shumë punë". Modeli është aty, ndërsa 18-vjeçari i Milanit duket se ka recetën për ta pasuar, sidomos nëse Bufon tërhiqet në fund të sezonit ashtu siç ka deklaruar.

SHEMBULL - Nuk ka shembull më të mirë se Bufon për të zbuluar sa më shumë sekrete. Donaruma rrëfen për UEFA- n: "Me Bufonin jemi njohur në kombëtare dhe gjithmonë e kam ndjekur me vlerësim dhe vëmendje, për t'i vjedhur ndonjë hile të zanatit. Karakteristika që i kam më shumë zili është qetësia, si jashtë, ashtu edhe brenda fushe kur ka shumë tension". Buzëqeshja e 18-vjeçarit shtohet kur i kujtojnë komplimentet e Bufonit. Ai shton se: "E falënderoj gjithmonë sa herë flet për mua, nuk më ngelet veçse të jem krenar për fjalët e tij. Ka qenë fat dhe një përvojë shumë e bukur që, për disa kohë, kemi ndarë së bashku përvojën e grumbullimit në kombëtaren italiane".

ROLI - Roli i portierit ka ndryshuar shumë, sidomos në vitet e fundit. Edhe Xhixho është i ndërgjegjshëm që duhet të punojë shumë çdo ditë për të qëndruar në elitë. Donaruma e di shumë mirë përgjegjësinë e të qenit trashëgimtar i Bufonit dhe numri 1 i Milanit, pavarësisht se në fanellë mban 99. "Futbolli ka ndryshuar shumë e, për pasojë, edhe ne portierët nuk jemi njësoj me ata të disa viteve më parë. Personalisht më pëlqen shumë të luaj me këmbë dhe ta ndihmoj skuadrën duke qenë gjithnjë në dispozicion të shokëve. Sa për Nojerin e kam parë të bëjë çudira kur del nga porta dhe dua shumë ta imitoj në të ardhmen...".