Lojtarët shtrojnë darkë, por faturën e paguan Gjici
Presidenti batuta me të gjithë, por s'heq dorë nga ultimatumi
Kukësi po kalon një krizë rezultatesh, pasi në katër takimet e fundit ka marrë vetëm tri pikë. Kronologjia e ngjarjeve te Kukësi pas humbjes 2- 1 në shtëpi është e mbushur me zhvillime. Humbja e fundit ndaj Partizanit krijoi një gjendje kaosi te kampionët e Shqipërisë. Mbas ndeshjes me Partizanin që u zhvillua të hënën, ishte trajneri Milinkoviç, ai që iu bëri me dije lojtarëve se nuk do ishte më trajner i Kukësit dhe se ishte më mirë që ata ta dëgjonin nga vetë ai. Për këtë pohim, që ka rezultuar i nxituar pak më vonë, trajneri serb ka dëshmitar shumicën e skuadrës. Gjithsesi mbas takimit me presidentin Gjici, ditën e hënë në darkë, Milinkoviç dhe stafi u rikonfirmuan, pasi numri një i klubit i beson teknikut, si dhe u përjashtua nga ekipi mesfushori vlonjat Hair Zeqiri, i cili ishte mërzitur dhe i zhgënjyer dhe vetë nga situata që ishte krijuar. Presidenti Gjici shpërtheu në kritika mëngjesin e së martës për Allën, Alijevin, e në vazhdim për gjithë ekipin, por dhe stafin. Gjici kërkoi kthesën, kështu që fitoret me Laçin dhe Skënderbeun janë detyrim. Trajneri Milinkoviç filloi menjëherë përgatitjet dhe në konferencën e ditës së enjte u shpreh se ekipi është gati për ndeshjen me Laçin, si dhe fitorja është rruga e vetme për këtë sfidë.
DARKA
Senatorët e ekipit verilindor organizuan të enjten në mbrëmje një darkë në një prej restoranteve në zonën e Dajtit. Në këtë darkë reflektimi futbollistët ftuan presidentin dhe stafin e klubit. Kurrsesi nuk mund të mungonte kreu i klubit, presidenti Gjici. Presidentit i pëlqeu kjo ide dhe
përgëzoi disa prej lojtarëve organizatorë për darkën që nisi pasdite në orën 18:00 dhe zgjati rreth dy orë. Kreu i klubit njihet për temperamentin e tij të fortë, por në të dyja senset, në të mirë dhe në të keq. Gjithsesi, gjatë darkës ai shfaqi anën e kundërt të asaj që shpalosi në mbledhjen e fundit. Gjici ishte në humor
Nga darka e skuadrës kuksiane të mirë dhe direkt sapo shkoi në restorant, e nisi me batutat që e karakterizojnë. BATUTAT E GJICIT
Gazeta zbardh disa prej momenteve pikante të darkës.
Gjici: "Hë mo djem ku jeni, kështu po, mbas asaj humbje të rëndë jeni mbledhur, më pëlqen, keni reflektuar". Pasi është përshëndetur me disa prej lojtarëve dhe me stafin, Gjici ulet në krye të tavolinës ku karrigia e tij ishte e rezervuar dhe bosh. "Më ftuat për të më dhënë një darkë e ju erdha, ju e dini që unë ju qëndroj pranë, por bën vaki të më bëni ndonjë budallallëk këtë javë. Përndryshe, mos t'ju shoh më, gjeni vend e futuni", u thotë presidenti me të qeshur lojtarëve.
Gjici e nis me Hallacin: "Ku je mo Rraman, s'po të shoh fare, ke humbur, u plake tani". Ndërsa kapiteni i përgjigjet: "Ç'të bëjmë, këtu jam". Gjici nuk harron t'iu kujtoj futbollisteve se trajnerin e kishte në krah dhe se te gjithë duhet t'i binden atij. "Ja, për shembull, trajnerin e kam këtu në krah, të gjithë ju duhet ta ndiqni e t'i bindeni atij. E di që ju ka lodhur, u ka vënë shumë në punë, por nuk e arrini dot ju ritmin e tij, ndaj kemi marrë këto rezultate ne". Gjici ngacmon Allën, Musollin e me radhë disa të tjerë, por nuk harron Alijevin dhe Gurin, të cilëve u kërkon gola.
Gjici: "Alla ku je mor djalë, pse andej nga mesi ti?", e shtatlarti që nuk nxjerr zë. "Këtë radhë dua gola nga ju të sulmit, Alijev, Guri me ju e kam". Në fund, presidenti largohet dhe i thotë shefit të klubit Jonuz Hallaçi: "Jonuz, edhe pse na kanë ftuar këta djemtë, e di ti, darkat i paguan shefi, më sill faturën!" Me batuta dhe me humor mbyllet kjo darkë, ndërsa futbollistët shpërndahen në shtëpitë e tyre.