Reali kërkon Bonuçin në janar
Në Spanjë nuk kanë dyshime: “Los Blancos” do të tentojnë kapitenin e Milanit
Vitet e fundit, merkato ka treguar se shpesh aspekti ekonomik vlen më shumë se ai sportiv. Te Milani nuk duhet të jetë kështu, nëse marrim për bazë deklaratat e Marko Fasones, por në fund janë bilancet që tregojnë rrugën për t'u ndjekur. Administratori kuqezi është treguar ngaherë i qetë duke deklaruar: "Objektiv mbetet Champions-i, por nëse nuk kualifikohemi s'ka drama, thjesht do të shesim ndonjë yll të ekipit". Ditën e djeshme, mediat spanjolle flisnin për një yll që, me ose pa Champions, duket se nga Milani ka shumë gjasa të largohet.
KUSH? - Lista e të sakrifikuarve nuk është fort e gjatë, me Suson, Donarumën që duken si më mundshmit për t'u larguar, por sipas disa gazetave iberike, "kurbani" kuqezi do të jetë Leonardo Bonuçi. Pikërisht kapiteni, i ardhur nga Juventusi katër muaj më parë për 42 milionë euro, duket se është një nga dëshirat e Realit, me Milanin që mund të bindet nga milionat që ofrojnë madrilenët, por edhe nga nevojat buxhetore. Vendimmarrja e UEFA-s në lidhje me planet kuqezi do të jetë një shpatë Damokleu për fatin e 30vjeçarit, i cili, siç shprehen burimet e mediave spanjolle, mund të zbarkojë në kryeqytetin iberik që në merkaton e janarit me Milanin që do të gjejë ngushëllim ekonomik.
FINANCAT - Milani duhet ende të derdhë 28 milionë euro në arkat e Juventusit dhe nuk mund të shesë lojtarin për një shifër më të ulët se 42 milionë eurot me të cilat u ble, megjithatë mes problemeve financiare që trumbetojnë mediat amerikane dhe "Fair Play Financiar" të vonuar nga UEFA, Fasone mund të mos jetë më aq i qetë në javët në vijim dhe të detyrohet të ulet të bisedojë me Florentino Perezin. Ndërkohë, për të ushqyer edhe më shumë lajmin, ka menduar Serxhi Ramos, i cili në verë u përfol se kishte ndaluar pikërisht transferimin e Bonuçit në Madrid. Pikërisht kapiteni madrilen postoi një foto me maskë mbrojtëse dhe një moto të huazuar pikërisht nga Bonuçi...