Alegri në kaos, 18 ekipe të ndryshme në 19 ndeshje

Ndaj Barcelonës duhej fitorja, por edhe barazimi nuk është një rezultat i padobishëm. Juventusi i Maks Alegrit kthen faqe dhe përqendrohet në kampionat, ku nuk duhet të lejojë një shkëputje të mëtejshme të Napolit. Sfida ndaj Krotones e programuar për sot në mbrëmje, në orën 20:45, duket si rasti ideal për t'u rikthyer te fitorja. KONFERENCA - Më shumë sesa modulet, rëndësi ka mendësia për të përballuar kompeticionet. Në konferencë për shtyp, trajneri i "Zonjës" sqaroi: "Kryesore është të vijojmë punën të përqendruar dhe të mos humbim ekuilibrin. Nuk jemi në pozita delikate, pasi moment i vështirë mund të quhej ai i sezonit të kaluar, kur ishim 12 pikë larg kreut. Napoli ka një ritëm të jashtëzakonshëm, por edhe ne nuk jemi keq, pasi në kampionat po ecim mirë dhe jemi fare pranë kualifikimit në Champions. Detyra jonë është të mbërrijmë në mars me këto pozita, atëherë nuk mund të gabojmë më dhe do të mund të argëtohemi".

DYSHIME TAKTIKE - "Modulet vërtet kanë një rëndësi relative, një vit më parë deri në sfidën e Firences nuk po luanim mirë, por më pas m'u desh të ndryshoja dhe nuk patëm përmirësim të mëtejshëm. Ndaj Barçës luajtëm me katër lojtarë në sulm". Një tjetër çështje taktike është ajo e interpretuesve me Manxhukiç, që pritet të rreshtohet mes titullarëve.

"Disa si Bernardeski, Kielini dhe Kuadrado janë të dëmtuar, të tjerë duhet të respektojnë zgjedhjet e mia, gjithsesi shpresoj të rikuperoj ndonjë lojtar për javën e ardhshme". OBJEKTIVAT - Treni i kryesueseve në Serinë A nuk duhet humbur, por gabimet nuk lejohen as në Champions, ku klubi kërkon

kualifikimin nga faza në grupe. Alegri shpjegon këndvështrimin e tij: "Në tre e gjysmë nga katër ndeshjet e fundit me Barcelonën nuk kemi pësuar gol, mund t'i ndodhë gjithkujt të humbë ndaj katalanasve. Mundësia e kualifikimit në Athinë nuk është tragjedi, por një shans që duhet shfrytëzuar".