Tirana për “burg” në Shënkoll, thyhet Bylisi
Pjetrushi trondit kryeqytetasit, Karabeci shmang humbjen
Tirana "burgoset" në Shënkoll. Edhe pse të shumtë ishin skeptikët, skuadra lezhjane ka tronditur bardheblutë. Këta të fundit ndoshta e morën më lehtë sesa duhet këtë kundërshtar dhe kjo duket prej "rrotacionit" që Ze Maria bëri në formacion. Dhe ky gabim i kushtoi shumë. Një gol i Klaudio...
Tirana "burgoset" në Shënkoll. Edhe pse të shumtë ishin skeptikët, skuadra lezhjane ka tronditur bardheblutë. Këta të fundit ndoshta e morën më lehtë sesa duhet këtë kundërshtar dhe kjo duket prej "rrotacionit" që Ze Maria bëri në formacion. Dhe ky gabim i kushtoi shumë. Një gol i Klaudio Pjetushit i shtangu që në të 18-ën minutë dhe nëse s'do të jepej ajo penallti në të 69- ën, kryeqytetasit do të kishin pësuar humbjen e dytë sezonale dhe të parën në transfertë. Edhe pse lanë dy pikë, kryeqytetasit shkojnë +4 nga Bylisi, që dje u thye në Fier. Ky barazim sigurisht që solli zhgënjim te miqtë, por e kundërta ngjau te vendësit. Festa legjitime shpërtheu jo vetëm në tribuna, por edhe në dhomat e zhveshjes. Dhe me të drejtë, pasi në ndeshjen e parë në histori me skuadrën më të titulluar në vend, morën një rezultat të çmuar.
AVANTAZHI - Loja nis shpejt dhe të dyja skuadrat hidhen në kërkim të golit. Të parët që iu afruan zonës së rreptësisë janë shënkollasit në të 3' me anë të Kullit, por Abibi është më i shpejtë dhe rrëmben topin nga këmbët. Pas disa episodeve të varfra, në të 18' vendësit ndezin stadiumin. Pjetrushi merr topin që nga mesi i fushës, merr krahun e djathtë dhe pasi shmangu 2-3 futbollistë bardheblu, në hyrje të zonës lëshoi parabël, që është e pakapshme prej portierit të bardhebluve. Në të 24-ën reagojnë miqtë me Ngoonë, por portieri shmang rrezikun. Insistimi i Tiranës nuk mungon dhe në të 32-ën është Halili që sulmon nga e djathta, kroson në zonë dhe topi shkon te Ngoo. Por anglezi edhe pse shumë pranë vijës fatale, gjuan vetëm jashtë. Pas 7 minutash provon Çelhaka me goditje dënimi rreth 22 metra larg, por shënjestra është e gabuar. Në të 45-ën Pjetrushi kërkon avantazhin e dyfishtë me predhë nga 30 metra, por topi "stampohet" aty ku bashkohen trau me pingulen.
BARAZIMI - Ze Maria kishte dhënë udhëzimet gjatë pushimit dhe për rrjedhojë, skuadra bardheblu ishte më e organizuar. Në të 47-ën Sentamu provon të gjuajë nga distanca, por topi kalon mbi traun e Rinev Danajt. Në të 52' pas një krosim këndoreje, ishte Hoxhallari që e kap topin me kokë, por portieri i shënkollasve shmang rrezikun. Sikur
të mos mjaftonte disavantazhi dhe fakti që po shpërdoronin, Tirana mbetet në inferioritet numerik në të 64-ën. Çelhaka merr të dytin të verdhë për stimulim, pasi rrëzohet në zonë pa top. Pas këtij momenti, vendësit preferojnë më shumë të mbrohen, për rrjedhojë bardheblutë
kishin terren të pastër në gjysmëfushë për të sulmuar. Por edhe këtu "ngecin" pasi mbrojtja e drejtuar prej Kullit bën rezistencë dhe për këtë motiv kryeqytetasit ndryshojnë strategji, duke provuar fatin me goditje standarde. Në 67-ën veproi kështu Hoxhallari, por
grushton Rin Danaj. Topi shkon në këmbët e mbrojtësit të majtë, por portieri vendës ndërhyn për ta marrë dhe rrëzon Hoxhallarin. Kryesori Klajdi Kola sinjalizon që ka penallti dhe mendon Karabeci, i cili vetëm dy minuta më herët u fut në fushë në vend të Kërçikut që
të shfrytëzojë këtë episod. Kapiteni gjuan dhe në të 69-ën i çon shifrat në 1-1. Pas barazimit, futbollistët shënkollas u munduan që të organizonin ndonjë sulm sporadik, por më shumë vëmendjen e kishin te mbrojtja. Tirana nuk kishte çfarë të humbte, ndaj tenton
përmbysjen. Por Karabeci gjen vetëm rrjetën e jashtme në të 83ën. Edhe pse u akorduan 4 minuta shtesë, nuk pati më surpriza. Skuadrat ndajnë nga një pikë, që në fund të fundit u shërbeu të dyjave. Shënkollit për moral dhe Tiranës për t'iu larguar vendit të dytë.