Milinkoviç: Doja vetëm pikët, nuk më interesonte loja

Fitorja është ajo që ka kënaqur trajnerin Milinkoviç, pavarësisht se loja e Kukësit nuk ka qenë në nivelin e duhur. Në intervistën e dhënë për "SuperSport", pas ndeshjes së djeshme, Milinkoviç ka theksuar se fitorja erdhi në një moment mjaft të rëndësishëm.

Shënuat të parët, por më pas e tërhoqët ekipin. Përse bëtë një zgjedhje të tillë?

Deshëm të mbanin rezultatin te mos pësonim gol. Në qoftë se ne arrimë të mos pësojmë gol, fitojmë, pasi ne nuk kemi vuajtur për të shënuar. Deshëm ta godisnim kundërshtarin mbas shpinës në kundërsulme, por kjo nuk u realizua shumë mirë. Gjithsesi jam i kënaqur me 3 pikët.

Keni bërë sërish ndryshime në formacioni, kapiteni Hallaçi dhe Alla u lanë në stol...

Ne deshëm të kishim një mbrojtës të shpejtë në vend të Hallaçit sepse Laçi kishte në krah një lojtar shumë të shpejtë si Uzuni. Për sa i përket Allës, vjen nga një gabim në ndeshjen me Partizanin, nuk ishte i qetë psikologjikisht dhe mendova mos e aktivizoj, pasi lojtarët kur kthehen nga gabimet, nuk janë të qetë.

Ekipi juaj duket sikur nuk po funksionon në grup dhe loja sot (dje) nuk bindi. Keni një koment?

Kur vjen pas 3 barazimesh dhe një humbje në shtëpi, psikologjia nuk është e duhura. Sot nuk na duhej loja, na duheshin tri pikët. Ia arritëm qëllimit dhe uroj lojtarët për shpirtin luftarak në fushë.

Si arritën lojtarët ta kalonin momentin e vështirë psikologjik? Gjatë gjithë kësaj javës u munduam të ishim afër lojtarëve, madje, pardje dolëm darkuam së bashku. Ishin momente delikate pas 3 barazimesh dhe 1 humbje. Ana psikologjike luan rol të rëndësishëm në një ndeshje futbolli. Megjithatë, unë kam aq eksperiencë sa t'i përballoj momentet e vështira.