Dedja: Frikën e kam sqaruar me ekipin, s'merrem me interpretimet
Trajneri: I bindur që kthesa e Lushnjës nis sot
Trajneri i Lushnjës, Hysen Dedja, në konferencën për shtyp para ndeshjes me Kamzën, është shprehur se e ka sqaruar me skuadrën e tij problemin e "frikës". "E kam pasur atë mendimin e frikës që ma kanë keqinterpretuar dhe e kam sqaruar gjithçka me skuadrën. Nuk sqarohem me të tjerë. Interpretimet mund t'i bëjë kush të dojë dhe si të dojë", ka thënë trajneri Dedja. I pyetur për problemet në mbrojtje dhe faktin që skuadra pëson gol shpejt jashtë fushës, tekniku shkodran u përgjigj: "Duhet të themi që skuadra ka shfaqur probleme në fazën mbrojtëse, gjë që më del për ta korrigjuar sot, ndaj Kamzës. E kam thënë që kemi marrë gol në minutë të parë, në minutë të fundit dhe është ai mentaliteti që nuk besojnë te vetja dhe pres një reagim të madh në ndeshjen e radhës", deklaroi tekniku Dedja. Pas fitores me Teutën, në 3 ndeshjet e radhës skuadra ka marrë 3 humbje. Në lidhje me këtë ecuri, trajneri i Lushnjës u shpreh: "Nuk e kisha menduar asnjëherë se do ta nisja me tre humbje, pavarësisht se shorti na ka vënë përballë një kalendar të fortë, ku në katër takime, tri janë jashtë qytetit tonë. Duke ditur gjithmonë se ana morale nuk ka qenë e mirë dhe si e tillë mbetet, unë pres reagimin e ekipit. Duke qenë gjithë ditën me futbollistët, që janë cilësorë, parashikoj që reagimi do të vijë që sot ndaj Kamzës. Besoj shumë se sot do të marrim pikën për të filluar me rezultatet pozitive". Trajneri Dedja vlerësoi kundërshtarin, por theksoi se Lushnja do të marrë pikë duke mos e shkuar ndër mend rënien nga Kategoria Superiore. "Patjetër që është një takim mjaft i
fortë me një skuadër që ka vazhdimësi në rritje. Unë kam besim te skuadra, pavarësisht se vijmë nga tri rezultate negative. Por në lojë ne kemi rritje dhe e kam thënë në media e para skuadrës që këta futbollistë stërviten jashtëzakonisht mirë dhe kanë dëshirë të rriten. Në Kamëz shkojmë për një rezultat
pozitiv. Unë e kam thënë për të tria takimet që kam drejtuar skuadrën se do të marrim rezultat pozitiv dhe më ka dalë e kundërta. Më ka mbetur peng takimi me Flamurtarin, por ne nuk do të heqim dorë asnjëherë nga qëndrimi në Superiore", mbylli konferencën për shtyp trajneri Dedja. Alban Alushi