Vllaznia B nuk ndalet, Burreli drejt rënies
Matjanët mbeten në vendin e fundit dhe rrezikojnë shumë
Vllaznia B nuk di të ndalet. Shkodranët kanë arritur dje fitoren e treta radhazi në kampionat, duke treguar se do të jenë një kockë e fortë për të gjitha ekipet. Pas suksesit ndaj Besës dhe Erzenit në transfertë, Vllaznia B dje ka fituar 1-0 në fushën e vet ndaj Burrelit. Një gol i Milotit ka mjaftuar për t'u siguruar 3pikëshin shkodranëve, ndërsa matjanët e mbyllin fazën e parë të kampionatit më keq se asnjëherë tjetër në sezonet e fundit. Burreli nuk ka marrë asnjë fitore deri tani dhe rrezikon shumë rënien në Kategorinë e Dytë. NDESHJA
Ka qenë një ndeshje, e cila është dominuar nga Vllaznia B nga fillimi deri në fund, ndërsa Burreli nuk ka pasur fuqinë e duhur për të ndëshkuar shkodranët. Vllaznia B në këtë përballje pati edhe disa mundësi të tjera për të shënuar, por shpërdoroi përpara portës, duke humbur kështu një shans për të marrë një fitore më të thellë. Takimi nisi i shpejtë dhe që në minutat e para janë shkodranët që krijojnë rastet e para. Erkoçeviç, Miloti dhe Balaj janë gjithmonë të rrezikshëm në zonën kundërshtare. Ndërsa miqtë vetëm mbrohen dhe mundohen të dalin ndonjëherë në kundërsulm, por janë të parrezikshëm. Pas shumë rastesh, në fund të pjesës së parë është Miloti që finalizon saktë një aksion të shkodranëve dhe kalon të tijtë në avantazh. Në pjesën e dytë, trajneri i miqve, Shahin Berberi, bën disa ndryshime, por që në lojë nuk ndryshon asgjë. Vllaznia B e menaxhon si duhet avantazhin, duke mos e diskutuar fitoren. Në këtë fraksion, vendësit kanë edhe disa raste të pastra për shënim, por mungon finalizimi i saktë përpara portës. Deri në fund nuk ka më gola dhe Vllaznia B siguron 3-pikëshin e radhës dhe ngjitet në vendin e 7-të me 11 pikë. Nga ana tjetër, Burreli mbetet në vendin e fundit në grupin A dhe rrezikon seriozisht rënien në Kategorinë e Dytë. Një takim që është ndjekur nga shumë tifozë. Duket se Vllaznia B po arrin rezultate më të mira se skuadra e parë. Edhe pse konsiderohej si një ekip që do të thyhej nga të gjithë, Vllaznia B po rezulton një kockë e fortë.