Pogradeci nis ngjitjen, trajneri i Turbinës akuzon lojtarët
Pogradecarët kanë marrë tri pikët e radhës dhe e shohin veten në vendin e tretë në renditje me 15 pikë. Ndërsa Turbina vazhdon të mbetet në vendin e parafundit në renditje. Dy ekipe që realisht kërkuan fitoren, por liqenorët ishin me të qartë tek ajo çka kërkuan dhe falë aftësive individuale të Çekiçit dhe Shytit mundën të marrin tri pikë.
Ndeshja - Një fillim loje pa shumë ritëm dhe grintë, por vendësit shfaqen rrezikshëm në minutën e 7-të të lojës, atje ku pas një goditjeje këndore topi mbërrin te Çekiçi, që tregohet i saktë me gjuajtjen tokazi. Më pas loja duket se ka një rritje nga të dyja ekipet, por vizita e parë e miqve do të vinte në minutën e 26-të, por sulmuesit nuk përfitojnë nga rrëmuja në zonën e liqenorëve. Çekiçi do të shfaqet i vetëm përballë portierit Malaj, por ky i fundit i zhytet në këmbët e sulmuesit. Surprizon Turbina në minutën e 34-t falë një veprimi të saktë nga e majta e Agalliut një devijim i topit i lehtë dhe miqtë barazojnë rezultatin. Me këtë barazim mbyllet pjesa e parë. Në fraksionin e dytë janë vendësit më kërkues dhe kanë disa mundësi goli, por sulmuesit nuk tregohen të saktë në finalizim. Në minutën e 59-të do të jetë Shyti që depërton nga e majta e sulmit të vet dhe gjuan prirazi me portën, duke shënuar golin e avantazhit dhe njëkohësisht të fitores. Më pas loja ka pasur gabime të dukshme nga të dyja ekipet që janë munduar të luajnë më shumë në mesfushë, sidomos vendësit në administrim të rezultatit. Vetëm në minutat e fundit të takimit si rezultat i presionit, miqtë kanë disa mundësi me anë të Bajramit dhe Gërxhos, por sa për aftësi të Malit, aq edhe për nxitim të sulmuesve nuk barazojnë dot rezultatin. Bardhi - Pas ndeshjes, trajneri i Turbinës, Sinan Bardhi, ka akuzuar lojtarët e tij për gabime foshnjarake dhe mungesë impenjimi. "Bëjmë gabime fëminore dhe pikërisht në dy momente të tilla u dhamë mundësinë kundërshtarëve të na shënojnë. Ne kemi pasur rastet tona, por nuk i shfrytëzuam siç duhet. Jam totalisht i pakënaqur nga ajo që dhanë tre ose katër futbollistë të mi. Duket se atyre u ka humbur dëshira për lojë dhe për fitore. Këtë do ta diskutoj edhe me presidentin, pasi nuk vazhdohet më kështu. Nuk më shqetëson fakti se ku jemi në renditje, pasi ky ekip ka shumë forcë për të qenë më lart. Me kalimin e javëve do të rikthehemi", përfundoi Bardhi. Romeo Xinxifi GOLAT: Çekiçi 7', Shyti 59'/ Agalliu 34'
POGRADECI: Mali, Shyti, Çekiçi, Pere, Jahaj (Alillari 46'), Pura, Hysenllari, Lame, Kllogjeri, Topllari, Liçkollari.
Trajner: F.Fetollari TURBINA: Malaj, Agalliu, Ferhati, Qorri (Gërxho 46'), Bakiu, Taullau, Doda, Rroshi (Allamani 67'), Dollani (Sallaku 64'), Daci, Bajrami.
Trajner: S.Bardhi KARTONË TË VERDHË: Shyti, Rroshi, Dollani
GJYQTARË: A.Stola, R.Dorhani, E.Morina