Botas “pole position”, në mes të shkretëtirës
Në Çmimin e Madh të Abu Dhabit, që do të zhvillohet sot në orën 14.00, nga vija e parë e startit pritet që sot ta nisë garën, Valteri Botas, i cili siguroi dje "pole position" në pistën e Jas Marina. Piloti finlandez i Mercedes dha kohën më të shpejtë në pistë 1' 36" 231 duke qenë i pakapshëm nga rivalët, madje edhe nga shoku i tij i skuadrës Luiz Hamilton, që u rendit i dyti. Makina gjermane ishte shumë e shpejtë, e meritoi rezultatin duke treguar se është favorite sot për ta fituar garën e fundit sezonale në Formula 1. I treti u rendit Sebastian Fetel me Ferrarin, por që s'pati asnjë shans të dyluftojë për "pole" në provat e sotme.
Në vijën e dytë, në krah të Fetelit do të jetë australiani i Red Bullit, Daniel Riçiardo, i cili u rendit i katërti dhe kaloi në fund Kimi Raikonen me makinën tjetër Ferrari, që u rendit i pesti. I vetëm u rendit i gjashti Verstapen me Red Bullin, ndërsa në "top- 10" më të mirët janë renditur, Hulkenberg (Renault), Perez e Okon me "Force India" si dhe Masa me Uilliams. Piloti brazilian zhvillon sot garën e tij të fundit në Formula 1, pasi do të tërhiqet nga ky sport. Gara e sotme pritet që të jetë një duel mes dy pilotëve të Mercedes, që në provat e djeshme treguan se janë shumë më të shpejtë. Ndërkohë pilotët që u eliminuan nga sfida për "pole" janë Grosjan (Has), Gazli ( Toro Roso), Uerlejn e Erikson me Sauber si dhe Hartlej me Toro Roso. Kohën më të shpejtë në këtë sesion e dha Valteri Botas me Mercedes.