‘Magjistari’ Uillian shpëton Çelsin
Blutë e Kontes ruajnë distancën mbi të kuqtë, por humbasin terren nga Junajtid
Çelsi arrin të barazojë 1- 1 në "Anfield", duke thyer ëndrrën për fitore të Liverpulit ( në avantazh deri në minutën e 85-të) në javën e 13-të të Premier Ligës. Pas një pjese të parë pa emocione të mëdha, ndeshja "ndizet" pas pushimit. Në të 64-n Salah firmos rrjetën e rezultatit të përkohshëm 1-0, por 5 minuta nga fundi Uillian (i sapofutur në fushën e lojës), arriti një goditje-kros që befasoi portierin Minjole, duke i lejuar Kontes të ruajë distancën prej 3 pikësh nga të kuqtë. Londinezët, megjithatë, humbasin terren nga Mançester Junajtid (që dje mori tri pikë me vuajtje në "Old Trafford" ndaj Brajtonit).
VRULL I TË KUQVE - Djemtë e Klopit nisen me marsh të lartë dhe shtyjnë Çelsin në gjysmëfushën e vet me një manovër agresive. "Tredhëmbëshi" Salah-Starixh-Çembërlein, me Kutinjon në mbështetje të linjës "shkatërruese", krijon shqetësimet e para për mbrojtjen e Kontes me pasime të shpejta dhe precize. Pavarësisht zotërimit të dukshëm në favor të vendësve, është Çelsi që, megjithatë, krijon rastin e parë të pastër: Hazard lirohet me lehtësi jashtë zonës së rreptësisë dhe gjen hapësirën për të provuar të djathtën. Minjole gjendet i gatshëm dhe dërgon topin në goditje këndi. Blutë tregojnë se nuk kanë ardhur për "shëtitje", por janë djemtë e Klopit ata që shkojnë më pranë golit të avantazhit: disa momente përpara vërshëllimës së dyfishtë, në fakt, "ish"- i Salah "rrëqeth" Kurtuanë me një goditje që "qeth" edhe shtyllën.
"MAGJI" E UILLIAN - Me nisjen e pjesës së dytë, Liverpuli tregohet më deciziv, merr fuqi dhe, pasi vendos nën presion londinezët, gjen golin e avantazhit në minutën e 64-t. Pasimi i Kutinjos bllokohet nga Bakajoko, që me një prekje të paqëllimshme shërben
në mënyrë të pashmangshme për Çembërleinin: sulmuesi shërben për "shigjetën" Salah, gati të dërgojë topin pas shpinës së Kurtuasë. Reagimi i Çelsit vjen me aktivizimet e Fabregasit e Pedros: blutë ndjekin lojën e skuadrës së Klopit dhe shpesh bien pre e
"kurthit" të pozicionit jashtë loje (plot 5 herë). Me kalimin e minutave, situata për miqtë vështirësohet, por Konten e shpëton "magjia" e Uillianit, që nxjerr "lepurin nga kapela" në të 85-ën me një konkluzion ndoshta pak të kërkuar, por megjithatë efikase: pasi i ikën
markimit në të djathtë, befason Minjolenë me një parabolë që përfundon nën këndin e portës. Në fund, Liverpuli i shkon pranë golit të fitores (sërish Salah provon me të majtën në limitin e zonës, largon Kurtua), por sfida përfundon në "paqe".