Musta dhe Kaçi, kur “receta” vjen nga porta

Të kuqtë detyrim fitoren, korçarët me karakter europian

Partizani pret Skënderbeun me shpresën për të bërë kthesën pas suksesit në Kukës. Ndërsa Skënderbeu, pas fitores së parë në grupet e Ligës së Europës, do të kërkojë që sot "të vrasë" kampionatin. Perlat Musta dhe Jani Kaçi, dy ish-portierë të skuadrave respektive dhe të Kombëtares, përmes prononcimit të tyre për "Panorama Sport" kanë treguar "recetat" e fitoreve të mundshme të Partizanit dhe Skënderbeut. Këto "receta" vijnë pikërisht nga portierë me një karrierë të lavdishme dhe Musta mund të quhet pasuesi i Kaçit, jo vetëm te Partizani, por edhe tek ekipi kombëtar. Portieri korçar ka mbrojtur portën e Partizanit në dy vite, 1973-1975, ndërsa Musta e ka nisur karrierën te "demat" tri vite më vonë. Te Kombëtarja ka rastisur që të dy portierët të jenë për pak kohë bashkë, pikërisht në vitet 1981-1984, që përkojnë me fundin e karrierës së Kaçit te kuqezinjtë dhe me startin e Mustës. Të dy ish-portierët kanë treguar arsyet e tyre pse skuadrat fitojnë sot. Musta është treguar më i rezervuar në pjesën teknike, pasi nuk ka dashur të hyjë në detaje tekniko-taktike, por, sipas tij, Partizani e ka detyrim fitoren dhe zgjidhjen e takimit e pret nga çdo lojtar që mban veshur sot fanellën e kuqe. Ndërsa Kaçi është treguar më i qartë në analizën e tij, duke i detajuar arsyet e fitores së Skënderbeut në transfertën e kryeqytetit. Sipas ish- portierit korçar, Skënderbeu ka krijuar një karakter europian si klub, si dhe vlerëson trajnerin Daja për njohuritë në futbollin tonë. Lojtarët e Skënderbeut i shikon më me eksperiencë dhe kualitet në krahasim me të kuqtë. Faktor tjetër, sipas Kaçit, është edhe atmosfera e dy klubeve, ku Skënderbeu është superior. Musta "thumbon" me të shkuarën, pasi gjatë karrierës së tij, kurrë nuk e ka parë Skënderbeun si rival.