Lika: U ndëshkuam nga pakujdesia e portierit

Trajneri i Luftëtarit, Hasan Lika, është parë mjaft i nervozuar me futbollistët e tij gjatë takimit duke kërkuar më shumë në fazën sulmuese. Humbja në shtëpi i fut bluzinjtë në zonën e ftohtë dhe për teknikun një gjë e tillë nuk është aspak pozitive. "Është një humbje që na ndikon negativisht, por më jep shpresë mënyra se si luajmë. Luftojmë në çdo ndeshje për të marrë pikët. Dominojmë edhe kundërshtarët, por na mungon eksperienca. Zhvilluam një ndeshje, të cilën nuk duhet ta humbnim", tha trajneri, i cili nuk e pranoi faktin se mendon më shumë për repartin e mbrojtjes. "Ju më njihni si trajner mbrojtës, kurse unë nuk e njoh veten ashtu. Sot kemi luajtur në sulm për 90 minuta. Kundërshtari nuk na rrezikoi aq shumë, por edhe për ndonjë pakujdesi të portierit, u ndëshkuam", vazhdoi Lika në "SuperSport". I pyetur për gabimet që kanë bërë futbollistët në pasimet finale, tekniku sqaroi: "Disa herë, pasimi i fundit na mungoi, përfshirë dy-tre futbollistë. Pretendojmë që të përmirësohemi, që ta kalojmë këtë situatë. Mund të ishim në ndonjë pozicion tjetër në tabelë, por ky është futbolli. Mund të luash edhe më mirë se kundërshtari, por ndonjëherë i marrin pikët të tjerët. Kemi besim se do t'ia dalim të ngrihemi. Na mungoi pasimi i fundit, pasi disa herë e kapën Vllazninë në kundërsulm. Patëm qarkullimin e topit. Kur humbim raste, bëhet kjo pyetje e tillë. Kur luajmë në mbrojtje, na thoni pse mbylleni në mbrojtje", është shprehur trajneri. Javën e ardhshme, bluzinjtë do të kenë një tjetër ndeshje mjaft të vështirë, por këtë herë në shtëpi ndaj Flamurtarit.