Gilman Lika: Nuk jemi për mbijetesë, çalojmë në finalizim

Mesfushori shkodran: Kualitetet tona të tjerët nuk i kanë

Gilman Lika ishte lojtari më i mirë në ndeshjen e djeshme, duke shënuar dy gola, edhe pse i pari iu quajt Ramadanit të Luftëtarit për shkak të atij devijimi të lehtë që i bëri. Në një deklaratë të dhënë për "SuperSport", pas takimit mesfushori me eksperiencë në Superiore e konsideroi fitoren e dytë rresht në shtëpi edhe si ringjalljen e këtij ekipi. "Ne nuk e rrezikonim mbijetesën në asnjë moment dhe një gjë të tillë e kam thënë edhe kur kemi qenë në momente të vështira. Jam i bindur se, me kalimin e ndeshjes, do përmirësohemi akoma më shumë", ka thënë Lika, i cili po kthehet në një sulmues të mirëfilltë për shkak të golave të shënuar, që aktualisht janë dy. "E rëndësishme është të bëhen golat. Kur thuhet mungon një sulmues goli, përgjegjësi kanë të gjithë, edhe mesfushorët. Kemi çaluar shumë në pjesën e finalizimit. Unë personalisht kam besim se, pavarësisht pozicionit që kemi në renditje, nuk jemi për mbijetesë. Ky ekip ka kualitete që ndoshta shumë ekipe të tjera nuk i kanë. Duhet të qëndrojmë me këmbë në tokë. Çdo ndeshje është e vështirë", vazhdoi futbollisti, i cili foli edhe për një problem që skuadra duhet ta përmirësojë. "Pasimet vertikale janë një problem që duhet ta korrigjojmë. Këtë ndeshje nuk patëm shumë vertikalizime. Në takimin me Lushnjën kishim 7-8 raste për gol. Ekipi sot (dje) nuk krijoi raste, pavarësisht se e dominuam ndeshjen", ka mbyllur futbollisti. Lika, që mban edhe shiritin e kapitenit, është një prej lojtarëve që mban peshë të madhe te skuadra e Vllaznisë dhe në dy ndeshjet e fundit ka treguar një formë mjaft të mirë.