Tomori zgjedh trajnerin e ri, Gersi Arbri në stol

Ish-futbollisti beratas do të prezantohet sot, do të debutojë në transfertën e Pogradecit

Ka marrë fund dilema në lidhje me emrin e trajnerit të ri. Gersi Arbri është tashmë "timonieri" i ri i skuadrës së Tomorit. Pas dorëheqjes së trajnerit Santiliano Dule, klubi beratas është vënë menjëherë në kërkim të pasardhësit të tij dhe tashmë e ka bërë zgjedhjen përfundimtare. Nga informacione shumë të sigurta për "Panorama Sport", ish- futbollisti Arbri pritet të prezantohet gjatë mesditës së sotme dhe, më pas, do të zhvillojë edhe seancën e tij të parë nën drejtimin e skuadrës. Gersi Arbri ka qenë alternativa e parë për të marrë drejtimin e skuadrës dhe një gjë e tillë është bërë e ditur nga gazeta që në momentin e parë të largimit të trajnerit 29- vjeçar nga Tomori. Ky vendim i marrë nga klubi pretendohet të jetë më i miri, duke shpërblyer edhe në këtë mënyrë të gjithë mundin dhe djersën që ka derdhur Arbri përgjatë viteve që ka luajtur me Tomorin. Arbri, që mban edhe një post të rëndësishëm si drejtues i Klubit Shumësportësh Tomori, tashmë do të ketë një detyrë të re ku do të drejtojë ekipin. Arbri do të debutojë në krye të skuadrës beratase në transfertën e fundjavës në Pogradec. Duhet thënë se Tomori ka në përbërje lojtarë cilësorë që në takimet e deritanishme kanë treguar vlera. Megjithatë, pritet që në merkaton e janarit të ketë ndërhyrje dhe të afrohen disa lojtarë që të fuqizojnë ekipin për pjesën e mbetur të kampionatit. Synimi i beratasve këtë sezon është që të renditen në 5- shen e parë pas dy fazave të para. DULE

Ndërkaq, ish- tekniku Santiliano Dule, që dha dorëheqjen të premten me një fjalim përpara lojtarëve, sot pritet t'ia paraqesë këtë vendim klubit me shkrim. Dule e drejtoi skuadrën përgjatë 8- të ndeshjeve në kampionat, duke grumbulluar 14 pikë në një grup të ngjeshur me rival, ku dhe pozicionohej në vendin e 3të pas Tiranës dhe Bylisit.