Operohet Higuain, mungon me Napolin dhe ndaj Interit
Për Juven, në dyshim edhe Kuadrado, Lihshtajner e "Berna"
Mundën Krotonen, duke bindur vetëm në pjesën e dytë, por udhëtimi në Napoli për Juventusin, të premten, do të jetë tepër i vështirë. Ajo që meriton të quhet dueli për titull do të ketë një mungesë shumë të madhe, atë të Gonzalo Higuainit. Ish- i i shumëpritur dhe i urryer nuk do të jetë në "San Paolo", në ato 90 minuta plot adrenalinë të pastër, në të cilën "Pipita" do të mungojë si rrjedhojë e një frakture të vogël në dorë. Por ai që fillimisht ishte dukur një problem që mund të zgjidhej pas ndeshjes me Krotonen, në të vërtetë, radiografia ka treguar se argjentinasi duhet ta operojë dorën dhe nuk duhet të rrezikojë që të ketë tronditje. Trajneri Alegri, i cili e kishte lëshuar këtë alarm në pritje të transfertës në Napoli, përmasat janë bërë dje edhe më të mëdha, sepse doktori që do ta operojë, Mateo Vitali, flet edhe për të paktën 2 javë (ose 3) qëndrimi jashtë fushe. Kjo do të thotë se, përveç Napolit, ai do të humbë jo vetëm sfidën vendimtare me Olimpiakosin, në Athinë, për kualifikimin në Ligën e Kampioneve, por është në dyshim tepër serioz edhe për sfidën tjetër për titull, pas dy javësh, kundër Interit. Gjithsesi, telashet për Masimiliano Alegrin nuk përfundojnë këtu, sepse formacioni i tij është i gjithi i varur nga të dëmtuarit. Nëse mbrojtësi Xhorxho Kielini është e sigurt që do të rikthehet, në dyshim serioz janë anësori i djathtë, Stefan Lihshtajner dhe dy mesfushorët ofensivë, Huan Kuadrado dhe Federiko Bernardeski. Dhe të gjitha këto lajme janë një dhimbje koke për trajnerin bardhezi, i cili edhe një herë tjetër duhet të shpikë një formacion.