"Ultras Guerrils" kanë thumbime për të gjithë
Grupimi i tifozëve të Partizanit, "Ultras Guerrils", kanë treguar dhe dje hapur pakënaqësitë në lidhje me drejtuesit e klubit dhe mënyrën se si ata e kanë ndërtuar skuadrën e këtij sezoni. Nëpërmjet mesazheve, ata kanë thumbuar fillimisht drejtorin sportiv, Antonelo Preiti, duke i kujtuar një deklaratë të tij të dhënë pak kohë më parë që u shpreh se kishte marrë pjesë në shitjen e Kuadrados për 40 milionë euro nga Udineze te Juventus. "Uno radiator e l'altro 'Cuadrado' a 40 milioni. D anoi avete portat un muchio di bidoni", ishte parulla që i drejtohej Preitit, që e përkthyer në shqip përshtatet: "Një tjetër lojtar skarco është një 'Kuadrado' që vlen 40 milionë, por te ne keni sjellë një mal me bidona". Gjithashtu një mesazh ka pasur edhe për presidentin Demi dhe numrin e madh të këshilltarëve që ai ka në klub. "President janë këtu në tribunë të vërtetët, ju dhe këshilltarët peng të premtimeve mbetët". Ndërkohë që, edhe pse nuk ishte i pranishëm në pankinë për shkak të dënimit, ultrasit e kuq nuk kanë lënë pa thumbuar edhe trajnerin Starova. "Nuk bëhet ekipi fitues nga "Facebook"u i gruas". Pak kohë më parë, trajneri ka përdorur rrjetin social të bashkëshortes për t'i kthyer përgjigje profesorit të njohur, Përparim Kabo, në lidhje me një koment që ai kishte bërë për gjendjen e Partizanit. Tifozët e Skënderbeut, Ujqërit e Dëborës, shpalosën këtë banderolë dje në stadium: Kampionët e komitetit, jo më pjesë e realitetit. Skënderbeu me meritë, Europën sot traditë