Apolonia, shpërthimi perfekt
Trajneri Kashami: Ishim të rrënuar psikologjikisht, ja si e motivova ekipin
Pa përjashtuar Shënkollin që barazoi me kryesuesit, Apolonia mund të quhet me plot gojë skuadra e javës në Grupin B të Kategorisë së Parë. Fierakët kanë marrë një fitore të merituar ndaj Bylisit, në një dominim total në lojë e në rezultat. Ka qenë ndeshja më e mirë sezonale e Apolonisë dhe situata në kampin bardhejeshil është shumë pozitive. Ai që e ka shprehur më tepër është trajneri Ndriçim Kashami, për faktin se pankinat janë pika e referencës në rastin e rezultateve të një skuadre, por edhe për faktin se fierakët kanë reaguar kur duhet, pasi vinin nga dy humbje radhazi. KASHAMI
"Ka qenë një ndeshje e rëndësishme për ne, përtej rezultatit që arritëm. E them këtë në planin e ecurisë dhe të pozicionit tonë në renditje. Një rezultat negativ do të na ulte disa shkallë në renditje dhe do të ndikonte negativisht dhe në psikologjinë e lojtarëve për në vazhdimësi", shprehet fillimisht Kashami. Më tej, kreu i pankinës fierake ndalet më konkretisht te ndeshja me Bylisin duke u shprehur i kënaqur me lojtarët e tij në zbatimin e detyrave taktike në fushë. "Me Bylisin ishim përgatitur me shumë seriozitet dhe me
kujdes, pasi është një ndër ekipet më të forta të kampionatit. Gjithë futbollistët kanë qenë maksimalisht të përqendruar gjatë të javës dhe unë e kam ndier dëshirën e tyre për të dalë fitues. Nuk ka qenë e lehtë për të punuar në aspektin psikologjik, pasi dy humbje
radhazi kishin krijuar efekt negativ, megjithatë gjithçka e kapërcyem dhe ia dolëm me sukses. Ka qenë një ndeshje e interpretuar perfekt nga ana jonë dhe kjo është Apolonia e vërtetë, kjo është skuadra që synojmë. Me këtë dua të them se nëse ekipi
funksionon në harmoni të tillë, nuk ka asnjë kundërshtar që mund ta ndalë. Ju e patë, Bylisin e kemi zotëruar në çdo drejtim dhe kur i shërben lojës ashtu siç duhet, rezultati nuk mungon", thotë Kashami. Por trajneri i Apolonisë është i kujdesshëm dhe
i trembet ndonjë euforie të panevojshme të skuadrës së tij. "Jo, nuk kemi luksin që 'të fluturojmë', por ta shijojmë këtë fitore si rrjedhë normale të kampionatit. Në fund të fundit, kemi fituar në fushën tonë dhe këtë e kemi detyrim. Skuadra duhet të vazhdojë të punojë fort dhe me kokën ulur, të jetë me këmbë në tokë dhe të japë maksimumin në çdo ndeshje, pasi kampionati është i gjatë dhe nuk ka ekipe të lehta. Vetëm kështu arrijmë në objektivat tona", përfundoi prononcimin e tij, trajneri i Apolonisë, Ndriçim Kashami. Fierakët bënë një paraqitje spektakolare në ndeshjen e së shtunës dhe treguan se do të jenë një kockë e fortë për të gjitha ekipet kundërshtare. Pavarësisht se vetë fierakët e kanë shumë të vështirë që të pretendojnë ngjitjen duke parë diferencën me kreun dhe grupin e lojtarëve që ka në përbërje.