"Zi" për Mamurrasin, kur përjashtimi përjetohet si dramë
Pas më shumë se një dekade, në Mamurras ka "pllakosur zia". Ekipi i futbollit, që ishte i vetmi argëtim në qytetin e vogël, është shkrirë dhe përjashtuar nga kampionati i Kategorisë së Dytë. Më shumë se dhjetë vite më parë, presidenti Ded Ndreca nuk e kishte menduar kurrsesi një fund të tillë për skuadrën që e ngriti nga hiçi, me të cilën iu afrua ngjitjes në Superiore në dy raste. Por, tashmë që përjashtimi është fakt, tifozët dhe sportdashësit e këtij qyteti kanë nisur të ndiejnë boshllëkun e lënë nga mungesa e skuadrës. "DRAMA"- Edhe pse një fushë modeste futbolli dhe pak shkallë rreth saj, në çdo ndeshje që Mamurrasi luante brenda fushës së vet, shihje qindra tifozë që përkrahnin ekipin. Tashmë që nuk ka më një klub futbolli, sportdashësit janë të zhgënjyer. "Kemi mbetur pa asnjë argëtim, pasi futbolli ishte i vetmi që na bënte të mundur që një herë në dy javë të përjetonim emocione të forta. Tashmë që skuadra është përjashtuar, qyteti duket bosh. I bëjmë thirrje presidentit Ded Ndreca që të rindërtojë edhe një herë ekipin dhe të marrë pjesë në kampionatin e sezonit të ardhshëm. Nuk mund të qëndrojmë më pa futboll, për më tepër kur bëhet fjalë për ekipin e zemrës", shprehen të mërzitur një pjesë e përfaqësuesve të tifozërisë mamurrasake. Presidenti Ded Ndreca, i cili ka hyrë tashmë në historinë e futbollit shqiptar duke varur këpucët në gozhdë në moshën 51-vjeçare, është duke përjetuar një moment të vështirë. Megjithatë, të gjithë në atë që ndryshe quhet si "qyteti i trëndafilave", i kanë sytë nga njeriu i befasive se në kampionatin e ardhshëm do të bëjë të mundur të rikthejë skuadrën e Mamurrasit. Ahmet Zani