Gatuzo, fanatik i sulmit me 3, në rrezik moduli i Bonuçit

Sistemi - Moduli i Montelës 3-5-2, në kohët e fundit i konvertuar në 3-4-2-1, mund të jetë një pikënisje për Gatuzon, por me shumë gjasa tekniku i ri kuqezi do të propozojë një Milan të ri me një skemë të re. Fanatik i 4-3-3, Rino e nisi përvojën me të rinjtë me këtë skemë, por pas dy humbjesh, reagoi duke kaluar në 3-4-3 që solli gjashtë fitore duke e renditur Milanin e të rinjve në vendin e tretë dhe fare pranë kreut. Bonaventura dhe Suso përgatiten të kthehen në vijën e parë të sulmit, ku në qendër do të luajnë me radhë të gjithë bomberat e organikës kuqezi. Ka pak gjasa që të ndodhë, por nëse Rino vendos të luajë me katër mbrojtës, duhet verifikuar përshtatja e kapiten Bonuçit, një nga arsyet madhore e zgjedhjes së Montelës për të luajtur me tre lojtarë në prapavijë.

Fantazi - Kalendari i buzëqesh teknikut të ri të "Djallit", me një ndeshje në kupë, dy në kampionat ndaj Bolonjës dhe Beneventos dhe një të fundit në Ligën e Europës, ku kualifikimi është i siguruar. Eksperimentet do të jenë në rend të ditës në "Milanello" me Gatuzon që mund të shpalosë edhe Milanin me fantazistë falë një 3-41-2, ku pas dy pykave mund të aktivizohen praktiku Bonaventura ose Çalhangolu që, prej muajsh, shpalos vështirësitë e tij në qendër apo krahët e mesfushës. Ardhja e Gatuzos rindez konkurrencën në ekip, ku "senatorët" do të kërkojnë të përfshihen mes titullarëve ose të pretendojnë më shumë minutazh, sidomos Injacio Abate për shumë vite shok skuadre me Rinon apo Rikardo Montolivo ndër më të mirët në takimet e fundit.