Hysaj i djathtë, në sulm bëjnë ligjin “xhuxhët”

Në një vit “përmbyset bota”, Napoli mbrojtja më e mirë

Me gjithë mungesat që Juventusi do të ketë sot, duke marrë parasysh edhe faktin që, përveç Manxukiçit, pritet që edhe Kuadrado ta nisë nga stoli, bardhezinjtë pritet që forcën e tyre të sulmit ta spostojnë në korsinë e majtë, ku do të tentojnë të përdorin shpërthimet e Aleks Sandros dhe Duglas Kostës. Për këtë arsye, trajneri Mauricio Sarri ka nevojë për cilësitë "speciale" të "ushtarit" të tij universal dhe të besuar, Elseid Hysaj. Shqiptari, i cili pas dëmtimit të Gulamit u spostua në krahun e majtë, sot mund të kthehet në rolin e tij natyral, në të djathtë, për të përmbajtur dhe për të ofruar cilësitë e tij ndaj shpejtësisë së juventinëve. Kjo do të bëjë që Maxho të ulet në stol dhe në të majtë të luajë Mario Rui, ndërsa pjesa tjetër e formacionit nuk do të ketë surpriza.

"XHUXHËT" NË SULM - Napoli (35) dhe Juventusi (40) janë dy skuadrat që kanë shënuar më shumë në Serinë A, 75 gola së bashku; 11 golashënues të ndryshëm për të kaltrit, 12 për bardhezinjtë. Këto dy "koperativa" goli edhe sot do të mbështeten te "snajperistët" e tyre, Dibala në radhët e Juves me 12 realizime dhe Mertens nga ana tjetër me 10. Ajo që bie në sy sot, është se, në mungesë të Higuainit, duke qenë se Manxukiç është e sigurt që nuk do të jetë, përballë mund të jenë dy reparte sulmuese të përbëra nga lojtarë shtatshkurtër. Napoli mbështetet te tre "xhuxhët" e tyre fluturues: Insinje (163 cm), Mertens (168) dhe Kajehon (176), ndërsa Juventus te Dibala (177) dhe Duglas Kosta (172). Me pak fjalë, sot pritet një sfidë e luajtur në shpejtësi dhe paparashikueshmëri.

PËRMBYSET BOTA - Nëse Juventusi po stonon sivjet dhe Napoli po fluturon, diferencën nuk e ka bërë sulmi, por mbrojtja. Nëse bardhezinjtë kanë qenë prej të paktën 6 vitesh prapavija më e fortë e Italisë dhe e Europës, sivjet gjërat kanë ndryshuar, sepse aktualisht është Napoli që mbështetet te mbrojtja më e fortë. Të kaltrit kanë pësuar 9 gola, ndërsa torinezët 14 gola në 14 ndeshje. Mund të themi se bota është përmbysur brenda një viti, sepse saktësisht një vit më parë, në të njëjtën periudhë, ishin bardhezinjtë mbrojtja më e mirë e Serisë A me 9 gola të pësuar, ndërsa Napoli numëronte po kaq sa ka pësuar sivjet Juventusi. Dhe ndoshta, diferencën në renditje sivjet e ka bërë pikërisht ky fakt.