Milinkoviç: Do t’i thyejmë korçarët
"Edhe ne humbëm pas tri barazimeve, tani ia kalojmë këtë situatë edhe kundërshtarit"
Trajneri i Kukësit, Ml laden Milinkoviç, injekton besim te skuadra e tij në prag të ndeshjes ndaj Skënderbeut. Sipas tij, kampionët në fuqi shkojnë në Korçë me synimin e vetëm: fitoren. I pyetur dje në konferencën për shtyp para se Kukësi të udhëtonte drejt qytetit juglindor, nëse do ta kënaqte një pikë, serbi i pankinës përsëriti faktin se ekipi i tij luan për tri, edhe pse përballë është Skënderbeu. Sipas tij, kushtet e vështira atmosferike nuk favorizojnë asnjë ekip.
Është mirë apo keq për ju që kjo ndeshje do të luhet në një situatë të tillë?
Nuk jam unë përgjegjës për të vendosur për këtë çështje. Nëse fusha e Korçës do të jetë në gjendje të mirë, atëherë do të luajmë futboll. FSHF ka njerëzit e saj që do të na thotë nëse do të luajmë apo jo.
Kushtet klimaterike në Korçë janë në favor apo disfavorin tuaj?
Besoj se nëse shiu do të vazhdojë kështu, fusha do të prishet. Mendoj që është njësoj si për ne edhe kundërshtarët. Ne jemi përgatitur gjatë gjithë javës për këtë ndeshje. Nëse do të shtyhej, nuk e di si do të bëhej në vazhdim, pasi programi është shumë i ngjeshur.
Ju kënaq një barazim në Korçë apo kërkoni më shumë?
E kam thënë vazhdimisht që në çdo fushë duam të marrim trepikëshin, sidomos tani që e kemi ulur diferencën nga 8 në 6 me Skënderbeun. Një fitore do të na sillte më afër, por megjithatë për ne, ajo që ka rëndësi është të luajmë mirë dhe të marrim sa më shumë pikë.
Është kjo ndeshje shansi i fundit për ju për të ngushtuar diferencën?
Nuk besoj që kjo ndeshje do të vendosë gjithçka, por është rast i mirë, pasi do të vinim më shumë në presion Skënderbeun. Mua nuk më intereson Skënderbeu, por ekipi im. Nuk është ndeshja e fundit, pasi të gjithë kundërshtarët kanë mundësi të marrin pikë nga ekipet pretendente. Siç keni parë edhe dy ekipet e tjera që janë pretendente, humbasin pikë, si dhe kanë barazuar, kështu që mund të ndodhë gjithçka.
Nëse ndeshja do të shtyhej, mund të dilnit jashtë programit?
Besoj që nëse e shtynin, do të na nxirrte pak jashtë programit, por ky nuk është justifikim. Nëse shtyhej për ne, do të shtyhej edhe për ekipet e tjera. Nuk do të ketë ndonjë diferencë të madhe. Në kushte
të tilla atmosferike e programon ndryshe stërvitjen, nuk mund të ndjekësh programin që ke bërë, të bësh ato gjëra që mund t'i bësh në një kohë më të mirë.
Mund ta shfrytëzojë Kukësi këtë moment të mirë që po kalon dhe, për më tepër, tani
që Skënderbeu vjen nga tri barazime radhazi?
Nëse ne fitojmë, atëherë do të vijë Skënderbeu në gjendjen tonë të mëparshme, kur kishim tri barazime dhe një humbje. Kështu do të ngushtojmë diferencën, si dhe do të krijonim besim. Pra, mund të themi se
do të ishim brenda objektivave që kemi vënë në fillim të vitit.
Do presim një Kukës sulmues kundër Skënderbeut?
E sigurt është që ne me Skënderbeun do të mundohemi të marrim trepikëshin. Pastaj, çdo lloj taktike që duhet të zgjedhësh ndaj Skënderbeut,
duhet bërë kujdes, pasi ata janë ekip i mirë. Në kushte të tilla, terrene të rënduara, një gabim mund të vendosë fatin e lojës, kështu që duhet pasur shumë kujdes. Ne vijmë pas dy fitoreve dhe besoj se psikologjia e lojtarëve është rritur, kështu që duam një rezultat
pozitiv.
A mund të na konfirmoni se kush do të mungojë?
Përveç Albi Allës, i cili është i penalizuar nga kartonët, Alijev dy ditët e fundit ka bërë stërvitje, ndërsa Krkotiç besoj se do të jetë në gjendje për të qenë në 18-she.