Përmbytjet, ndalet Kategoria I dhe II
Gjendja e jashtëzakonshme, FSHF vendos të shtyjë edhe kampionatet e moshave U-17 & U-19
Shqipëria po futet në një gjendje të jashtëzakonshme si pasojë e motit të keq në dy ditët e fundit. Në këto kushte, duke parë edhe problematikën me stadiumet, por edhe vështirësitë që do të kenë skuadrat në udhëtimet që pritej të bënin gjatë fundjavës, institucioni i futbollit shqiptar ka vendosur dje të shtyjë për një afat të pacaktuar Kategorinë e Parë, Kategorinë e Dytë, si dhe kampionatet e moshave, U- 17 dhe U-19 për të dyja nivelet: Superiore dhe e Parë. Lajmin e ka konfirmuar dje përmes një komunikate për shtyp vetë FSHF. "Duke parë infrastrukturën dhe kushtet atmosferike të rënduara, nuk garantohet zhvillimi normal i ndeshjeve në këto kampionate. Në këto kushte ato janë shtyrë për javën e ardhshme", konfirmon institucioni i futbollit shqiptar. Tashmë mbetet për t'u parë se kur do të zhvillohen ndeshjet në tre kategoritë, teksa nuk përjashtohet mundësia që të luhen që në mesjavë. Mësohet se nuk do të ketë spostim të javëve, por si e Para, e Dyta dhe moshat, do të vijnë sipas kalendarit. Natyrisht, kjo shtyrje e parashikuar do të bëjë që sektori i garave në FSHF të afrojë një nga javët ose brenda dhjetorit, ose në të kundërt të ndryshojë kalendarin në vitin e ardhshëm. "Me këtë situatë ku ndodhet vendi, ku nuk garantohet as udhëtimi komod drejt qyteteve, kjo ishte zgjidhja më e mirë e mundshme. Ndërsa Kategoria Superiore ka një tjetër standard sa u përket stadiumeve, prandaj dhe nuk u ndërpre", ka sqaruar dje për gazetën shefi i garave në FSHF, Lysien Nurishmi, lidhur me shtyrjen e kampionateve. Në ditët e ardhshme Federata do të njoftojë klubet për kalendarin.