Lushnja si ekip minifutbolli, ecuria shqetëson këshilltarët
Qyteti i Lushnjës, ashtu si i gjithë vendi, është përfshirë nga një mot me lagështirë dhe me reshje të dendura të shiut. Kështu, Lushnja nuk mund të shfrytëzojë fushën e stadiumit, kur dihet se të dielën në shtëpi pret Partizanin. Ndërsa anekset janë në një gjendje të degraduar. Pavarësisht reshjeve të mëdha të rëna në dy ditët e fundit, fusha e stadiumit "Roza Haxhiu" ka një gjendje shumë të mirë. Por, kjo nuk mund të thuhet për anekset, terrenet e të cilit janë nën pushtetin e ujërave. Megjithatë, skuadra lushnjare nuk e ka ndërprerë për asnjë çast stërvitjen duke përgatitur me përkushtim maksimal ndeshjen me Partizanin. Skuadra
e trajnerit Dedja ngjan më shumë si një skuadër minifutbolli, sesa ekip normal i Superiores, kjo nga mënyra e përgatitjes. Gjatë këtyre ditëve, por edhe sa herë moti është i keq, është shfrytëzuar fusha e minifutbollit, pjesë e kompleksit sportiv "Lushnja Sport Center". Që këtu mund të imagjinohet se si mund të jetë pjesa tekniko-taktike e skuadrës, pasi përgatiten me një terren të kufizuar. Përpos vështirësive në përgatitjet javore, lushnjarët shpresojnë që të surprizojnë sërish Partizanin, ashtu si në fazën e parë që i morën një pikë në kryeqytet, ku ndeshja u mbyll 0-0. KËSHILLI BASHKIAK - Gjendja jo e mirë që po kalon aktualisht futbolli lushnjar është diskutuar edhe në Këshillin Bashkiak, që është njëherësh asambleja e "KF Lushnja 1930" sh.a. Anëtari i asamblesë Jakup Beqiri për "Panorama Sport" u shpreh: "Këshilltarët ngritën disa shqetësime në lidhje me rezultatet që ka arritur ekipi në Kategorinë Superiore, si dhe mungesën e spektatorit lushnjar në stadium. Ne e kemi mbështetur klubin e futbollit dhe kemi miratuar fillimisht 300 milionë lekë të vjetër. Pas suksesit që arriti ekipi duke u ngjitur në Superi- ore kemi miratuar edhe 100 milionë lekë të tjera të vjetër. Siç dihet, këto i shkojnë klubit të ndara në zëra. Për një ekip futbolli në Superiore është e kuptueshme që nuk mjaftojnë. Ne kemi bërë propozimet tona për të pasur aksionerë të tjerë në klubin e futbollit". Alban Alushi