Ozil del hapur: Po flas me Zidanin
Ndërkaq, Barcelona pritet t’i ofrojë Arsenalit për gjermanin shkëmbimin me Arda Turan
Përpara supersfidës së Premier Ligës kundër Mançester Junajtid, Mesut Ozil ka konfirmuar se idhulli i tij në botën e futbollit është Zinedin Zidan dhe se kur është takuar me francezin ka mbetur i bllokuar. Fantazisti gjerman ka rigjetur formën e tij optimale gjatë kohëve të fundit, madje është përfolur edhe për një kalim të tij te Barcelona në kampionatin spanjoll.
IDHULL - "Kur u bashkova me Realin e Madridit u takova me Zidanin: duart nisën të më djersijnë sepse isha shumë nervoz", shpjegoi gjatë një interviste për "Football Magazine". "Zidan është një person i sjellshëm dhe pozitiv. Mbajmë kontakte edhe sot e kësaj dite". Si lojtar, Zidan ka influencuar një gjeneratë të tërë dhe "ish"-i i Verder Bremenit nuk bën përjashtim: "Mënyra sesi ai lëvizte më mahniste", pranoi Ozil. "Mrekullohesha edhe nga si drejtonte stërvitjen. Teknika dhe kreativiteti i Zidanit janë të jashtëzakonshme. Gjithmonë kam dashur të bëhem si ai".
SHKËMBIMI - Barcelona, ndërkaq, po përpiqet të vrasë "dy zogj me një gur": ideja e drejtuesve katalanas është të dërgojnë Arda Turanin në Angli tek Arsenali, si pjesë e marrëveshjes për blerjen e Mesut Ozilit. Lojtari i kombëtares turke nuk po gjen hapësira nën drejtimin e trajnerit Ernesto Valverde dhe Gallatasaraji shihet si një tjetër destinacion, pasi katalanasit po kërkojnë t'i gjejnë sa më shpejt një sistemim. Dhe interesimi i tyre për Ozilin mund të sjellë largimin e Turan te "Topçinjtë", sipas zërave të përcjellë nga britanikja "Daily Star", ndërsa Arsenali mendohet të mos pranojë oferta më të ulëta për fantazistin gjerman. Kontrata e Ozilit skadon në fund të sezonit, megjithatë Arsen Venger ka këmbëngulur se lojtari është i pashitshëm.