Inter-Kievo, në “San Siro” luhet në... lartësi
Përballen ekipet që shfrytëzojnë krosimet dhe krahët
Nesër pasdite, në "Meazza" do "fluturohet". Disi prej zakonit të së parit, stadiumin e zikaltërve gjithmonë shumë të frekuentuar (do arrihet deri në 60 mijë spektatorë), por edhe sepse statistikat e mbledhura nga Opta tregojnë se Interi i Luçiano Spaletit dhe Kievo i Rolando Maranit janë më të zotët e Serisë A për të shënuar me kokë (bashkë me Juven).
NGA KRAHËT - Për më shumë, dy skuadrat që do përballen nesër në 15:00, janë mes më të mirave (gjithashtu bashkë me bardhezinjtë) në arritjen e rrjetës duke shfrytëzuar krahët. Do jetë një takim idesh futbolli që preferojnë të përdorin krahët dhe kokën: për klubin zikaltër është logjike që zhvillimi i lojës të jetë i tillë edhe si rrjedhojë e fizionomisë së përgjithshme ( Kandreva e Perisiç), ndërsa ndjell kureshtjen fakti që skuadra e Venetos, megjithëse luajnë me një skemë 4-3-1-2, gjejnë rrugën e rrjetës nga korsitë anësore në mënyrë kaq konstante. Vetëm kundër Napolit, Maran kishte hequr figurën e fantazistit duke shtuar një "shkatërrues", me zhvendosjen e Birsas përkrah Inglezes e duke sistemuar Depaolin e Hetemajn më në krah për të krijuar vendosjen 4-4-2. Spaleti, në krahun tjetër, megjithëse gjen vazhdimisht zgjidhjet në zhvillim të lojës, si moduli 3-52 i përdorur ndaj Kaljarit, nis gjithmonë me 4-2-3-1.
LËVIZJET - Pra, të dielën, kujdes nga krahët dhe topat e lartë. Interi, Kievo e Juventusi kanë shënuar secili nga 6 gola me kokë, zikaltrit plot 10 pas një krosimi, verdheblutë dhe bardhezinjtë 7. Kandreva është simboli i krosimeve tek Interi: ka prodhuar 98, Perisiç është i dyti me 67. Skuadra e Spaletit këmbëngul të luajë përgjithësisht nga e djathta, atje ku mesfushori i Italisë do ketë përballë Hetemajn. Perisiç, në korsinë e kundërt do ketë Kaçiatoren, krosuesin më të mirë të Kievos.
SHIFRAT - Skuadra e Maran, jashtë fushës. Këtë vit ka humbur vetëm ndaj Juves (7 fitore nga 8 në "Juventus Stadium") dhe Sampdorias (6 fitore nga 6 në "Ferraris"). Një ecuri që do ta detyrojë Interin të luajë "pa ndalesë", ashtu si ka kërkuar disa herë Spaleti. Zikaltrit shënojnë prej 9 ndeshjesh radhazi në kampionat: ndërsa në 35 të fundit, vetëm me Napolin, 30 prillin e kaluar, sulmi zikaltër "ngeci".