Barcelona ngec, por Reali nuk përfiton
Skuadra e Zidanit nuk përfiton, diferenca e njëjtë
Mund të ishte dita që do të rihapte më shumë se kurrë kampionatin spanjoll, por Reali i Madridit nuk e shfrytëzoi ndalesën që bëri Barcelona ndaj Selta Vigos. Me një distancë kohore 8 orëshe, "galaktikët" e mësuan rezultatin e kundërshtarëve, por kjo gjë duket se rëndoi psikologjikisht dhe të besuarit e Zidanit nuk ditën ta thyenin Bilbaon. Në javën e 14të të La Ligës, diferencat mes dy gjigantëve mbeten të njëjta (8) pikë dhe skuadra e vetme që përfitoi është Atletiko e Madridit (edhe Valencia që luan sot). Skuadra e Valverdes u ndal edhe nga gjyqtari, ndërsa Reali në mbrëmje krijoi shumë raste, pa arritur ta dërgonte topin kurrë në rrjetë.
BAR A NGEC NË SHTYLLËEmocione, gola, protesta, shtylla dhe një barazim që i jep jetë kampionatit në Spanjë. Mes Barcelonës dhe Selta Vigos përfundon në barazim 2-2. Katalanasit nuk linin pikë në shtëpinë e tyre që prej 3 dhjetorit të vitit të kaluar, kur Ramos barazoi "klasiken" në minutat e fundit. Nga ai moment ishin 28 fitore radhazi, por Selta i jep fund ecurisë pozitive. Në gjashtë ndeshje, Barcelona ka arritur 4 barazime mes Champions-it dhe kampionatit, që do të thotë se diçka po shkon keq. Ky barazim lë shije të hidhur edhe për faktin se Suarezit iu anulua një gol i rregullt dhe u goditën dy shtylla që e dërgojnë në 19 numrin e tyre gjatë këtij sezoni. Valverde luan me skemën 4-4-2 me Paulinjon, Rakitiçin, Iniestën dhe Busketsin në mesfushë, ndërsa Mesit i jep lirshmëri përpara. Ishte pikërisht argjentinasi që shënon një gol me aksion spektakolar, kur më parë Aspas kishte kaluar në avantazh Selta Vigon. Avantazhi zgjati vetëm 2 minuta, pasi numri dhjetë i Barcelonës barazoi gjithçka në pjesën e parë. Kalojnë vetëm 6 minuta nga goli i barazimit dhe Suarez shënon një tjetër, por arbitri e konsideron të parregullt. Mesi godet shtyllën pak minuta më vonë, ndërsa barazimi zgjat për 1 orë. Luis Suarez këtë herë nuk mund të gabojë dhe kalon në avantazh Barcelonën. Selta Vigo kundërpërgjigjet tetë minuta më vonë me Gomezin, i cili vendos baraspeshë. Por vendësit i kishin mundësitë që të shënonin edhe golin e fitores me Pikenë, i cili i vetëm përballë portierit godet shtyllën, ndërsa ankthi te tifozët u shtua për dëmtimin e Umtitit.
Ndeshje e mrekullueshme, Barcelona e pafat ndalet.
"FINALISTËT"- Zinedin Zidan zbret në fushë heronjtë e finales së Kardifit, por disa muaj më vonë ata duket që nuk janë të njëjtët. Kanë humbur freskinë fizike, shpejtësinë në daljet e kundërsulmit,
shënojnë më pak gola dhe, për më tepër, janë gjithmonë në panik kur të tjerët i sulmojnë. Bilbao duhej mposhtur patjetër për të shkurtuar diferencën me Barcelonën, por kjo gjë nuk ndodh. Ndeshja përfundon me rrjeta të paprekura falë pritjeve spektakolare të
portierit Kepa, por edhe të Kejlor Navasit. Reali vinte pas 4 fitoresh radhazi kundër Bilbaos, por dështoi të merrte të pestën që do të ishte një nga më të rëndësishmet. Pavarësisht sulmeve të njëpasnjëshme, goditjeve të Marselos dhe një shtylle të goditur nga
Ronaldo, "galaktikët" u larguan vetëm me 1 pikë. Mungesa e një sulmuesi dhe e Bejlit ndikojnë shumë në lojën e madrilenëve sepse Zizu nuk kishte zëvendësues të aftë për të ndryshuar fatin e takimit. Qarkullimi i topit ishte i kot, ndërsa frika për ta humbur
ndeshjen u shtua kur Ramos u ndëshkua me karton të kuq duke u bërë lojtari me më shumë të kuq në historinë e kampionatit spanjoll. Me këtë ndalesë, Reali rikthehet 8 vite në kohë, duke bërë nisjen më të dobët që nga viti 2009. Pas 14 javësh ka vetëm 28 pikë.