Tifozët kapen me Frashërin, Takaj dhe Gjici takim privat
Presidentët mbyllen në dhomë për 15 minuta
Pak më shumë se 2 mijë tifozë ishin të pranishëm në stadiumin "Skënderbeu" në ndeshjen e djeshme, numër i konfirmuar nga kompania private që merret me shitjen e biletave. Rreth 30 tifozë nga Kukësi kishin udhëtuar për të mbështetur skuadrën e tyre të zemrës mbrëmë në stadiumin "Skënderbeu", teksa ishin vendosur në tribunën E, madje kishin shpalosur edhe pankartën e tyre të zakonshme "Mërgata".
- Ultrasit e Skënderbeut ishin vendosur në tribunën C dhe shpalosën një pankartë gjigante në fillim të takimit, ku ishte vendosur një "ujk" që u jepte leksione futbolli, ndërkohë që nxënësit ishin me bluzat e Kukësit, Flamurtarit dhe Partizanit. Përveç pankartës gjigante, ultrasit e Skënderbeut dje kishin shpalosur edhe një banderolë të re ku shkruhej "Ilir Daja strategu i kampionëve", banderolë, e cila, në fakt, vinte pas thashethemeve në mesditën e djeshme ku spekulohej se Daja kishte problem me drejtuesit dhe fati i tij varej nga fitorja ndaj Kukësit.
- Tribuna qendrore e stadiumit juglindor ka qenë e tejmbushur, ku nuk kanë munguar presidentët respektivë. Presidenti i Kukësit, Safet Gjici, mbërriti rreth 30 minuta përpara fillimit, ndërkohë që menjëherë u vendos në tribunën qendrore, atje ku ka qëndruar me shoqëruesit. Nga ana tjetër, presidenti Ardjan Takaj, edhe ai ka qenë i shoqëruar nga drejtues të tjerë të klubit të tij, por që të dy bashkë e kanë ndjekur ndeshjen nga fillimi deri në fund. Në tribunë nuk munguan as kryebashkiaku i Korçës, Sotiraq Filo, dy ish- deputetë, Ridvan Bode dhe Gjergji Papa, drejtori Sportiv, Haris Fakiç, por edhe personalitete të shumtë.
- Presidenti Safet Gjici dhe presidenti Ardjan Takaj kanë qëndruar së bashku në 15 minutat midis të dy pjesëve në dhomën e presidentit Takaj, madje kanë shkëmbyer edhe ndonjë batutë mes njëri-tjetrit.
- Në pushimin mes dy pjesëve ka qenë portieri i dytë i Kukësit, korçari Stivi Frashëri, që pati një debat të madh me tifozët në tri-
bunën qendrore. Më pas gjithçka është qetësuar, edhe pse në fakt Frashëri është parë i inatosur. Kjo nuk është hera e parë që Frashëri sulmohet nga tifozët korçarë në qytetin e tij të lindjes, sidomos pas thumbimeve në distancë që ka pasur për moskalimin e tij te Skënderbeu, gjë që Frashëri ka polemizuar mjaft në të kaluarën.
-Një tifoz i Kukësit, i cili në pushim ka kapërcyer kangjellat e tribunës E, është hedhur në pistë teksa destinacion kishte tribunën e ultrasve të Skënderbeut. Kanë ndërhyrë menjëherë uniformat blu që e kanë kapur dhe e kanë shoqëruar tifozin, që nuk dihet se çfarë kishte në mendje për të bërë, kur përpara kishte shumë uniforma blu.
- Sapo gjyqtari Juxhin Xhaja ka vërshëllyer, presidenti Safet Gjici i Kukësit ka dalë menjëherë nga stadiumi dhe dukej më shumë se kurrë i mërzitur me skuadrën e tij, ndërkohë që ka shkëmbyer disa fjalë me miqtë që e rrethonin dhe ka hipur makinën duke u larguar nga Korça. Përkthyesi që shoqëronte trajnerin Milinkoviç të Kukësit, pas përfundimit, vazhdimisht është parë me kronometër në dorë duke u ankuar se ndeshja përfundoi 2 minuta përpara, por më pas ka mësuar se takimi ka përfunduar me çdo minutë të saktë të luajtur edhe pas katër minutave shtesë.