"Besim të verbër për disa, bëmë gabime foshnjarake"

Tekniku i Teutës ka pranuar gabimet e tij në zgjedhje për këtë ndeshje si dhe ka kritikuar futbollistët e tij me gabimet individuale. Gugash Magani, në deklaratën e dhënë për "Super Sport", ka marrë mbi vete përgjegjësi më shumë nga sa duhet, por në fjalën e tij nuk ka kursyer kritikat as për kapitenin Lena dhe as për Dediçin.

Pjesa e parë- "Mendoj që sot (dje) kemi zhvilluar ndeshje shumë të dobët. Kemi marrë një humbje të merituar dhe Kamza e meritoi fitoren. Skuadra u fut në fushë pa parë forcën reale të Kamzës". Shumë gabime - "Kam përgjegjësitë e mija edhe për ndonjë zgjedhje të gabuar që kam bërë sot (dje). Megjithatë, nuk mund të toleroj gabime foshnjarake, si te goli, si të kartoni i kuq. Është hera e dytë që ky futbollist na le me dhjetë. Do ta analizojmë. Kam pasur dhe kam besim, por ai duhet të dijë se është skuadra e para dhe më pas vjen ai. Përveç komisionit, do të përballet edhe me mua. Lena gaboi, por është kapiteni dhe nuk duhet të përsëritet. E kam këshilluar disa herë për atë veprim. Çdo njeri duhet të analizojë fillimisht veten, që nga unë i pari. Ne nuk dhamë asgjë në fushë. Skuadra luajti më mirë me dhjetë dhe pati motivim tjetër. Megjithatë, kam rezerva për një 11-metërsh të padhënë.

Penalltia e Lenës - "Mua më duket që është faull, por nuk dua të justifikohem me këtë episod. Është penallti që te Plaku". Euforia - "Edhe euforia është pjesë kryesore e humbjes, por edhe fakti që skuadra nuk është në ekuilibër. Unë shoh ekipin që bëri tri ndeshje të mira dhe më pas filloi një kthesë të frikshme si në fazën e parë. Nuk kemi kohë për të qarë, por ta mbyllim sa më lart në klasifikim dhe në janar do të shohim diçka".

Mungon finalizuesi - "Ne pësojmë gola që nuk duhet të pësohen. Këtu është problemi më i madh. Skuadra duhet të ketë një shënues, një goleador, por kryesore është të mbahet zero mbrapa. Kështu si shkoi loja, do isha shumë i kënaqur edhe me barazim". Pa lider - "Futbolli është kolektiv. Mund të jenë një apo dy liderë në fushë, por nuk janë të tjerët në lartësinë e duhur. Gjithsecili duhet të jetë lider që të mbajë përgjegjësi dhe të ringrihet në momente të vështira. Habitem sepse janë lojtarë që punojnë prej disa vitesh me mua. Disa herë kam qenë i verbër për besimin ndaj tyre. Kemi lojtarë me eksperiencë, por problemi është që duhet të jenë të gjithë në nivel".

Detyrat - "I kërkova ekipit që të vrapojë sa më pak dhe të luajë sa më shumë me topin. Për shkak edhe të terrenit, por edhe pse Kamza ishte më e freskët. Nuk e bëmë sepse luajtëm që në fillim me topa të gjatë. Kjo i shkon për shkak Kamzës që na vuri në vështirësi", ka deklaruar Magani.