Dedja: Lushnja i ka mundësitë që të mposhtë të kuqtë

Fitorja, alternativa e vetme për lushnjarët

Lushnjarët do të luajnë sot ndaj Partizanit me shpresën për të marrë pikët e para në fazën e dytë të kampionatit. Trajneri Hysen Dedja kërkon rezultatin e parë pozitiv nën drejtimin e verdhejeshilëve. Lushnja i ka humbur të gjitha ndeshjet e muajit nëntor. Katër në kampionat dhe një në Kupë, ndaj kërkon të bëjë më të mirën për dhjetorin. Trajneri Hysen Dedja tha se përgatitjet në fushën e minifutbollit nuk do të kenë asnjë ndikim në ndeshjen e sotme. "Për mua, përgatitjet e fundit nuk do të kenë ndikim negativ. 80-90% e stërvitjes dhe detyrat e dhëna për futbollistët kanë mbaruar te kjo fushë minifutbolli. Pavarësisht dimensioneve, në kushtet e një moti të jashtëzakonshëm ka qenë e mirë për ne. Lushnjës i bën punë vetëm fitorja ndaj Partizanit. Duam të marrim pikët e plota në këtë ndeshje, pasi çdo rezultat tjetër do të jetë jo pozitiv për ne. Ekipi gjendet në një formë të mirë sportive dhe psikologjike. Djemtë synojnë fitoren. Partizani është një kundërshtar mjaft i fortë dhe ndeshja është vlerësuar maksimalisht nga ana jonë. Nuk do të kemi përballë kundërshtarin e fazës së parë, pasi me ardhjen e Starovës, Partizani është rritur në lojë dhe në rezultate. Dua të shpreh respektin për të kuqtë dhe trajnerin që i drejton. Pavarësisht se kemi përballë sot një skuadër të fortë, një emër të madh dhe një trajner nga më të mirët, ne do të kërkojmë vetëm fitoren dhe e shohim plotësisht të realizueshme në fushën tonë", u shpreh për "Panorama Sport" trajneri i Lushnjës, Hysen Dedja. Alban Alushi