Bajri: Kastrioti është shkëputur shumë, por mund ta arrijmë
Besëlidhja vijon stërvitjen në kuadër të javës së 10-të të kampionatit. Transferta në Pukë ka marrë gjithë angazhimin maksimal të lezhjanëve, ndërsa duhet thënë që edhe shtyrja ka ardhur në kohën e duhur. Stafi teknik ka kohën e nevojshme që të rikuperojë ndonjë gabim të hasur në ndeshjen e fundit, atë që luajtën në Kupë me Skënderbeun. Portieri Samet Bajri, i cili ka zënë vendin e të "dënuarit" Elson Demi, për "Panorama Sport" shprehet optimist për vazhdimësinë, ndërsa hapur deklaron se do tentojnë fitoret e njëpasnjëshme gjatë fazës së dytë, me qëllim që të realizojnë misionin "final", që është renditja në pesëshen e parë. Dhe nëse ia dalin, sigurisht që do tentojnë edhe ngjitjen në Kategorinë Superiore. "Pas daljes nga moshat e Akademisë ' Vllaznia', në fund të sezonit të shkuar, më erdhi një ofertë nga Besëlidhja dhe mes disa ekipeve, kjo ishte zgjedhja ime. Deri tani, skundra ka shkuar mirë, por jo sipas parashikimeve, pasi ende ndodhemi në vend të dytë në renditje. Madje, me një diferencë të dukshme pikësh, gjithsesi koha që kemi në dispozicion na jep mundësi për reflektim. Tani po stërvitemi për transfertën delikate që luajmë në Pukë, e cila u shty për javën e ardhshme për shkak të shirave. Për ne, kjo është pozitive, pasi të mërkurën u ndeshëm me Skënderbeun për Kupë, një ndeshje që na shpenzoi shumë energji, edhe pse e humbëm. Tani po mendojmë vetëm për transfertën anti-Tërbun, pasi duhet që ta fitojmë dhe besoj se do t'ia dalim. Duke shfrytëzuar këtë pauzë, shpresojmë të karikohemi maksimalisht për ta përballuar me sukses Tërbunin", përfundoi shkodrani. Preng Gjikola