Tremb Briken Calja, humb ndjenjat pas konkurrimit
Sportisti shqiptar siguroi vendin e katërt në dygarësh
Peshëngritësi ynë, Briken Calja, që ka debutuar sot në garat e Botërorit që po zhvillohet në SHBA, nuk ka mundur të hyjë në zonën e medaljeve në Botërorin e Peshëngritjes, duke mos realizuar dot objektivin e tij, edhe pse vendi i 4-t në botë mbetet një rezultat i mirë. Paraqitja e Caljes nuk ishte ajo që pritej, duke e nisur mirë konkurrimin në të dyja kategoritë, por nuk kishte vijueshmëri në rezultate. Ai ishte shtangisti i dytë kuqezi që garoi në këtë Botëror pas Evangjeli Velit (e cila u rendit e 8-ta në peshën 58kg). Calja ka realizuar vetëm 2 nga 6 provat që kishte në dispozicion, nga një për secilin stil, duke u klasifikuar në vendin e katërt në shkëputje dhe në të pestin në shtytje. Ndërsa në dygarësh shtangisti kuqezi e mbylli garën në vendin e 4-t, me 317 kg, duke mbetur jashtë zonës së medaljeve. Në stilin e shkëputjes, Calja e nis mirë garën, duke ngritur në provën e parë 142 kg dhe garon për medalje. Por në provën e dytë ai nuk arrin të ngrejë lart 145 kg, ndërsa në provën e tretë tenton 146 kg, duke dështuar sërish, dhe e mbyll garën e këtij stili në vendin e katërt, duke mos hyrë në zonën e medaljeve. Edhe në shtytje Calja ka të njëjtën paraqitje, duke realizuar me sukses vetëm provën e parë, kur ngre 175kg. Më pas, ai tenton dy herë të ngrejë 180kg, por pa sukses, duke e mbyllur garën në këtë stil në vendin e pestë, ndërsa në dygarësh renditet në vendin e 4-t me 317 kg, duke qenë larg podiumit vetëm një kilogram më pak se vendi i tretë në dygarësh (318 kg). Peshëngritësi Briken Calja ka pasur probleme shëndetësore pas garës së zhvilluar sot në Botërorin e zhvilluar në Anaheim të Amerikës. Shtangisti kuqezi, pasi ka mbyllur provën e fundit në shtytje, ku dështoi të ngrejë 180 kg, është ndjerë keq dhe ka përfunduar pa ndjenja. Ndërhyrja e stafit mjekësor të Botërorit ka qenë e
menjëhershme dhe peshëngritësi kuqezi është dërguar me urgjencë në spital, ku ka qëndruar disa orë për një kontroll më të imtësishëm dhe tani është jashtë rrezikut për jetën. Nga burime të delegacionit kuqezi në Botërorin e peshëngritjes, bëjnë me dije se Briken Calja është ndjerë keq që para garës, por mjekët kanë thënë se shkak i humbjes së ndjenjave ka qenë dehidratimi, gati 3 herë mbi normën. Në një njoftim të tyre thuhet: "Calja është mirë dhe në garë arriti një rezultat të mirë. Vendi i katërt në botë është një vend i mirë, edhe pse ai dhe të gjithë ne synonim podiumin",
u shprehën drejtuesit e delegacionit kuqezi në Botëror. Calja u rendit i katërti në shkëputje, i pesti në shtytje dhe i katërti në dygarësh, me 317 kg në total.
Briken Calja në postimin e tij në rrjetin "Facebook" shkruan: "Sot për mua është një ndër ditët më të rëndësishme të jetës sime. Ky është evenimenti më i rëndësishëm për mua, familjen dhe për të gjithë ata që kanë mbështetur si dhe për të gjithë shqiptarët". Dje kanë garuar edhe sportistët e tjerë shqiptarë të peshëngritjes pjesëmarrës në këtë botëror, Romela Begaj, Erkand Qerimaj e Krenar Shoraj.