Partizani shmang gjobat, Europën e sheh nga Lushnja
Shënojnë mesfushorët, Starova: Kemi sulmuesit më të mirë në vend
Partizani i Starovës nuk mund të bëjë ga bimet që bëri skuadra nën drejtimin e trajnerit Iuliano në fazën e parë ndaj Lushnjës, pasi dje mori një fitore të pastër, 3-0, në "Roza Haxhiu". Kjo është fitorja më e thellë e të kuqve në këtë sezon, sukses i cili bëri që ekipi të përmbushë kushtin e drejtuesve pas disfatës me Laçin që kërkuan 7 pikë në tri takimet e radhës. Fitorja e djeshme e "demave" ka vlera të shumëfishta, pasi së pari, konfirmojnë ecurinë pozitive, afrohen më shumë me zonën europiane në tabelën e klasifikimit (5 pikë larg vendit të dytë), përmirësojnë golaverazhin, si dhe shpëtuan gjobën prej 4 mijë eurosh, e cila kishte lidhje të drejtpërdrejtë me trepikëshin ndaj Lushnjës. Ndërsa verdhejeshilët e trajnerit Hysen Dedja janë në krizë totale, ku nën drejtimin e shkodranit, Lushnja njeh vetëm humbje. Me trajnerin Dedja, Lushnja ka koleksionuar 5 humbje radhazi në kampionat dhe një në Kupë ndaj Laçit. Nëse Partizani konfirmoi dje ngritjen me trajnerin Starova, lushnjarët mbetën të fundit, me 5 pikë në 13 javë, duke qenë kandidatë seriozë për të rënë sërish në Kategorinë e Parë.
PJESA E PARË - Trajneri Hysen Dedja kurseu disa lojtarë në mesjavë në ndeshjen e Kupës për ta pasur më të freskët ekipin për Partizanin, por në fund nuk rezultoi kështu. Ndërsa trajneri Starova i mbetet besnik formacionit të zakonshëm, pasi ndaj Lushnjës luajti me të njëjtën njëmbëdhjetëshe si me Skënderbeun. Pjesa e parë u kushtëzua shumë edhe nga reshjet e dendura të shiut që ranë në Lushnjë. Partizani ishte më kërkues dhe gjatë gjithë kohës pati zotërimin e topit. Ndërsa Lushnja prioritet i kishte vënë fazës mbrojtëse dhe daljen përpara e kishte bazuar te kundërsulmet e shpejta që sa herë ndodhte, e vinte në vështirësi Partizanin. Për vetë kushtet e vështira atmosferike, të kuqtë më shumë rrezikuan me gjuajtje nga distanca, si dhe nga goditjet standarde. Në minutën e 22- të miqtë pretendojnë për një penallti të padhënë, ku gjyqtari Sadiku e konsideroi të rregullt ndërhyrjen e Maganit ndaj Kalarit. Lushnja mundësinë më të mirë në këtë pjesë e pati në minutën e 37-të, por Atanda u tregua i vëmendshëm dhe
e largoi rrezikun. Në minutën e 41-të, Lushnjës i vjen në ndihmë shtylla, që ndalon gjuajtjen me kokë të Prognit. 0-0 mbyllen 45 minutat e para.
PJESA E DYTË - Pjesa e dytë dhuron një tjetër tablo në Lushnjë, pasi përmirësimi i motit bën që të shpërthejë
edhe Partizani me tre gola. Në këtë pjesë vendësit treguan rënie në lojën dhe kondicionin duke lënë hapësira në mbrojte që u shfrytëzuan nga të kuqtë. Partizani e nis vrullshëm këtë fraksion, pasi që në minutën e parë kërkon të shënojë me Bathën. Në
minutën e 51-të, trajneri Dedja mundohet të freskojë fazën sulmuese duke aktivizuar Papën në vend të Alushit, i cili dy minuta më pas provon me një gjuajtje nga distanca. Pas disa tentativave, në minutën e 60-të, të kuqtë zhbllokojnë rezultatin me golin e kapitenit Idriz Batha. Pas këtij momenti, Lushnja nuk ka çfarë të humbasë më shumë dhe trajneri Dedja bën edhe dy aktivizime të tjera, ku Gava dhe Mone i lënë vendin Taullaut dhe Pepës. Ndërsa te të kuqtë, Asani i lë vendin Sukajt. Me shkodranin në majë të sulmit, loja e Partizanit merr ritëm tjetër, pasi krahët nisin të funksionojnë më mirë. Në minutën e 72-të vjen goli i dytë dhe i qetësisë për Partizanin me anë të Gerhard Prognit. Pas këtij goli nuk ka më histori në fushë, pasi gjithçka është në kontrollin e "demave". Në minutën e 76-të, Bardhi i lë vendin Filit dhe gjashtë minuta më pas vjen goli i tretë me autor Lorenc Trashin. Gramshioti nuk festoi në shenjë respekti ndaj ishskuadrës dhe tifozërisë lushnjare. Pas golit ka vend edhe për Kotobellin që hyn në vend të Prognit dhe gjithçka mbyllet në shifrat 0-3 për Partizanin.