Shtanget Gatuzo, i prish festën një portier juventin
Memushaj dhe Gjimshiti, në histori me ekipin e sapongjitur
Rozherio Seni, Rampula dhe Taibi hapuni! Miti i portierëve që bëhen heronj duke shënuar që sot është Alberto Brinjoli, gardian i Beneventos, por nën pronësi të Juventusit. Në sekondat e fundit të pesë minutave shtesë, ai braktis portën dhe, si një sulmues i regjur, falë një goditjeje me kokë, gjen golin që sjell pikën e parë në historinë e Beneventos në Serinë A në mënyrën më origjinale të mundshme.
MILANI I GATUZOS - Ndoshta një barazim i tillë tingëllon i çuditshëm, megjithatë nuk mund të thuhet se ishte i pamerituar. Rino e tha vetë që nuk ka më Milan të Montelës, por pavarësisht se nuk dihet se si do të jetë Milani i Gatuzos, dje kuqezinjtë dhanë disa sinjale ndryshe. Fillimisht golat, ato u realizuan nga Bonaventura dhe Kaliniç, dy lojtarë të humbur kur ekipi drejtohej nga "Aeroplani". Skuadra u duk më mbrojtëse se sa pritej me një mbajtje topi disi më të pakët në pasime se në takimet e fundit. Lojtarët shfaqën shpirt të lartë sakrifice, sidomos kur ekipi mbeti me dhjetë lojtarë pas përjashtimit të Romanjolit. Gatuzo është konkret dhe nuk pati probleme të mblidhte ekipin në mbrojtje të rezultatit duke zëvendësuar Suson me Zapatën.
TRE GOLA - Sa i përket Beneventos, De Zerbi e nisi takimin me një përqafim vëllazëror me Gatuzon (pas sherrit të 2016-ës) dhe e mbyll me një buzëqeshje. Benevento e fillon mirë pjesën e parë, por e mbyll keq me Memushajn dhe Parixhinin që i afrohen golit. Milani reagon me Kesin, që mbron një top në fundore dhe kroson në zonë, ku pas tentativës së Kaliniçit, është Bonaventura që shënon. As Brinjoli dhe as Gjimshiti nuk ndalin golin mik, me shqiptarin që kishte shpëtuar një herë portën pak sekonda më parë. Kaliniç-Bonaventura përsëri protagonistë në golin e dytë kuqezi, me kroatin që shtyn në portë një krosim të mesfushorit. Në mes të dy golave të Milanit, kishte ardhur edhe barazimi i Beneventos që zgjati vetëm tetë minuta. Nga zhvillimet e një goditje këndi, Leticia lëshon një predhë që grushtohet shumë bukur nga Donaruma, i cili nuk mund të bëjë asgjë ndaj Pushkashit që e dërgon pikërisht topin e grushtuar në rrjetë.
FUND! - Me gjithë ndërrimet dhe volumin e lojës, dukej se sfida do të përfundonte me fitore për skuadrën e Gatuzos, por Milani nuk i ka bërë mirë llogaritë. Shpërthim në krah, ku D'Alesandro parakalon Abaten që kishte vetëm pak minuta në fushë. Faull i mbrojtësit kuqezi me goditjen që ekzekutohet nga Danilo Kataldi. Krosimi i ish-lacialit gjen kokën e portierit Brinjoli, për festën e tij dhe të gjithë popullit kuqeverdhë në pikën e parë historike në Serinë A.