Lika: Vuajmë në mbrojtje, do ndryshojmë

Trajneri i Luftëtarit, Hasan Lika, falënderoi skuadrën për shpirtin e garës që tregoi në sfidën e djeshme ndaj Flamurtarit. Në prononcimin pas ndeshjes për "Supersport", ai deklaroi se gjirokastritët kanë mungesë në organikë dhe do të kërkohet ndërhyrje e menjëhershme në merkaton e janarit. "Kemi merita si skuadër dhe si individë që krijojmë, por duhet të jemi më të kujdesshëm të interpretojmë më mirë lojën, ashtu siç bëri Bregu te rasti i golit. Vazhdojmë të kemi probleme në aspektin mbrojtës. Kundërshtarët kanë bërë diferencën ndaj nesh në këtë aspekt. Megjithatë, meritojmë notë pozitive. Nuk është e lehtë pas disavantazhit të barazosh lojën dhe të krijosh volum të kënaqshëm. Unë dua të falënderoj futbollistët që dhanë maksimumin, por mbi të gjitha kapitenin Beqiri, i cili pësoi një dëmtim, por falë pjekurisë dhe eksperiencës që ka, arriti të jepte më të mirën. Dua të falënderoj edhe Rrocën e Aleksin, të cilët ishin probleme gjatë javës. I falënderoj edhe të gjithë të tjerët për shpirtin e garës dhe për lojën që zhvilluan. Kemi meritë për barazimin", deklaroi Lika për të folur më pas rastet e shpërdoruara. "Këtu ndikon edhe ngarkesa psikologjike, por kjo ndodh te çdo skuadër. Ne jemi ekip që krijojmë shumë por na mungon konkludimi i rasteve. Sot (dje) ndoshta më shumë se herë tjerët, pasimi i fundit nuk ka qenë cilësor. Kjo skuadër ka nevojë të përmirësohet në aspektin mbrojtës. Në momentin e pësimit të golit duhet të vendoseshim më mirë dhe të tregoheshim më të kujdesshëm. Edhe portieri duhet të ishte i kujdesshëm. Ne kemi lojtarë shumë të rinj në mbrojtje. Na duhet të përforcohemi sepse kampionati është i gjatë. Kam folur me presidentin dhe do të mundohemi të përforcohemi sepse kemi nevojë", përfundoi trajneri Lika.