Xhejms: Nuk do ndalem, shënoj edhe në Zvicër
Pas gjetjes së golave si në Europë ashtu edhe në kampionat, sulmuesi i Skënderbeut, Xhejms Adeniji, nuk kërkon të ndalet me kaq, por të vazhdojë me këtë ritëm gjetjen e rrugës së rrjetës. Objektivi i radhës është goli edhe në Zvicër përballë Jang Bojsit, që aq shumë e tundon nigerianin, teksa shpreh bindjen se Skënderbeu i ka të gjitha shanset të marrë një rezultat pozitiv. Xhejms ka kërkuar që t'i bëjnë një mbyllje të mirë Europës dhe më pas të përqendrohen në kampionat për të vijuar rrugën bindshëm drejt titullit. "Golat e fundit më kanë ndihmuar shumë dhe njëkohësisht janë një qetësi akoma më e madhe për një sulmues. Besoj se erdhën në momentin më të duhur, pasi kisha vërtet nevojë të gjeja rrugën e rrjetës. Sigurisht që tani e rëndësishme është që të vijoj me këtë ritëm dhe të mbaj të njëjtën ecuri për shënimin e golave. Kur e them këtë, dua që të përsëritem edhe në ndeshjen e fundit të Europës. Jam i sigurt se kemi mundësinë që të bëjmë një tjetër paraqitje të madhe, edhe pse do të jetë një ndeshje e vështirë. Do të kërkojmë të marrim më të mirën dhe të mbyllim me sukses këtë kapitull për t'u përqendruar te kampionati. Është ai objektivi jonë primar dhe duam që të mbyllim sa më shpejt çështjen e titullit. Është e vërtetë që kemi krijuar një diferencë të madhe me vendin e dytë, pasi tetë pikë janë goxha, por ende është gjithçka e hapur. Ka shumë javë për t'u luajtur dhe duam të mos e ulim përqendrimin", theksoi Xhejms për "Panorama Sport". I pyetur për përshtatjen me Souenë në sulm, ai u shpreh: "Ndihem shumë mirë dhe më mungoi ndeshjen e fundit. Shpresoj të kthehet shpejt, pasi është një ndihmë e madhe për ne në repartin e avancuar".