Shehi: Nuk dalim pa pikë, kemi vendosur standard të ri

Kapiteni i Skënderbeut, Orges Shehi, premton një mbyllje me nder në Ligën e Europës. Para udhëtimit në Zvicër, portieri shpjegoi përse rezultati pozitiv do t'i shërbente ekipit për vazhdimësinë në këtë sezon, por edhe për edicionin e ardhshëm. "Ta mbyllim me sukses edhe këtë ndeshje të fundit, që duhet të jetë vazhdë e paraqitjeve të mira. Do të ishim të kënaqur të mos dilnim pa pikë, por fitorja na bën shumë mirë për moral. Ta përfundojmë mirë grupin, sepse na shërben edhe për koeficientin kur hidhet shorti. Suksesi sjell shumë të mira dhe shpresojmë të dalim me pikë", deklaroi Shehi për "Supersport". Ndërkohë, pavarësisht eliminimit të parakohshëm në grupe, portieri e vlerëson paraqitjen e Skënderbeut përballë rivalëve me emër dhe buxhet më të madh në arenën ndërkombëtare. "Keqardhje nuk ka. Ndoshta do të ishte tjetër simfoni po të luanim për t'u kualifikuar. Megjithatë, ne kemi bërë shumë mirë në grupe, edhe pse pritshmëritë ishin të mëdha dhe kemi synuar kualifikimin. Kemi arritur një standard që i bën shumë mirë futbollit shqiptar, duke u paraqitur si të barabartë me çdo kundërshtar, edhe pse rivalët kanë qenë ndoshta pak më lart se ne, si nga buxheti, ashtu edhe nga përbërja. Kjo të bën të mos ndihesh inferior", theksoi Shehi. Në fund kapiteni i korçarëve foli edhe për kampionatin. "Sigurisht që pikët dhe diferenca të bëjnë të ndihesh komod, por nuk mund ta quajmë kurrsesi të përfunduar kampionatin, pasi është i gjatë dhe ende nuk ka kaluar gjysma. Ecuria e mirë vjen si vazhdimësi edhe e Europës. Kemi bërë mirë, por s'duhet të ndalemi".