Daja: Beogradi është pengu im
"Ndaj Jang Bojsit do promovojmë lojtarë të rinj, jemi të motivuar për ta mbyllur me fitore"
Trajneri Ilir Daja men don se Skënderbeu i tij ka mentalitet fituesi edhe në Europë, prandaj dhe sot ndaj Jang Bojsit, do të kërkojë fitoren, për të mbyllur në mënyrën më të mirë përfaqësimin në fazën e grupeve. Në konferencën për shtyp, kreu i pankinës korçare theksoi se do t'u japë hapësirë edhe disa lojtarëve të rinj, duke lënë të kuptohet se etiopiani 19-vjeçar, Demte, do ta nisë nga minuta e parë. "Duke parë edhe pozicionet e ekipeve në grupin B, nuk kemi pretendime për shkak se çështja e kualifikimit është zgjidhur tashmë. E rëndësishme për ne është të vijojmë me rezultatet pozitive, por njëkohësisht dëshirojmë të promovojmë dhe disa lojtarë të rinj në këtë takim të fundit. Nuk duhet të harrojmë që jemi të kondicionuar dhe nga mungesat e shumta. Në momentet e fundit kemi humbur shërbimet edhe të sulmuesit Xhejms për shkak të mosmarrjes së vizës. Kjo na ka prishur disi planet sa i përket formacionit", deklaroi fillimisht Daja. MOTIVIMI
Kreu i pankinës korçare u pyet nga gazetarët zviceranë se çfarë e motivon më tepër në këtë ndeshje skuadrën e tij, teksa dha këtë përgjigje: "Edhe pse nuk kemi shanse kualifikimi, vijmë në këtë ndeshje 100 % të motivuar.
Duhet ta mbyllim sezonin europian pozitivisht, ashtu siç edhe e kemi filluar. Skënderbeu ka luajtur si i barabartë me të gjithë rivalët në grup. Duhet të jemi në maksimumin e mundshëm për të mbajtur ritmin e treguar në këtë sezon, si në
Kupat e Europës, por edhe në kampionat", theksoi trajneri i Skënderbeut.
PENGU
Kualifikimi i munguar për fazën e 1/16-at mbetet peng për trajnerin Daja. Humbja ndaj Partizanit të Beogradit në transfertë bëri që të zbehte
shanset e korçarëve. Për këtë, Daja foli edhe në konferencën e djeshme për shtyp. "Mund të them që takimin në Beograd nuk meritonim ta humbisnim. Edhe në ndeshjet e luajtura në Shqipëri mund të merrnim më shumë, por u kondicionuam nga dëmtimet.
Nuk kam çfarë ju kërkoj më shumë lojtarëve, kemi arritur diçka të madhe deri këtu. Tani të shpresojmë ta mbyllim në vend të tretë", shtoi numri një i pankinës. Në fund, i pyetur për çelësin e suksesit me këtë grup lojtarësh, Daja u shpreh se
ekipi ka mentalitet fituesi. "Çelësi i suksesit është pa diskutim bashkëpunimi, duke nisur nga presidenti, te lojtarët dhe stafi administrativ i klubit. Elementi më i fortë është shpirti i skuadrës. Kemi mentalitet fituesi", përfundoi trajneri bardhekuq.