Mbledhjet e “nxehta”, gazeta disponon audio nga sherret te Kukësi

“Panorama Sport” nuk do të tërhiqet asnjëherë nga raportimi i së vërtetës

Menduat se fjalët "i paaftë", "mash trues" dhe "i pacipë" ishin më të rëndat që mund të dëgjonit? Apo mos vallë mendoi dikush se gazeta do të tërhiqej nga zbardhja e së vërtetës?

Jo, nuk do tërhiqemi nga raportimi i së vërtetës, por sigurisht që do tregohemi të kujdesshëm për të ruajtur etikën dhe të mos rrëmbehemi nga provokimet apo sulmet e vazhdueshme që kemi marrë nga klubi i Kukësit së fundmi. Gazeta "Panorama Sport", përveç materialeve që vërtetojnë lajmin mbi të cilin akuzohet, disponon edhe tre audio nga mbledhje të ndryshme në klubin e Kukësit. Gazeta është duke shqyrtuar me kujdes, gjakftohtësi dhe profesionalizëm nëse duhet apo jo të publikojë përmbajtjen e audiove. Arsyeja është vetëm një: duhet një zemër e fortë kur dëgjon kësi gjërash. "Panorama Sport" ka qenë gjithnjë serioze dhe e matur në trajtimin e lajmit. Për asnjë moment nuk e kemi kaluar etikën dhe jemi përpjekur të mos cenojmë kurrsesi integritetin e njerëzve. Për këtë arsye, gazeta është duke marrë në konsideratë të gjitha mundësitë dhe po peshon me maturi nëse duhet apo jo që të publikohet një material i tillë. Gazeta, më së pari, kërkon të garantojë lexuesit e saj se nuk luan kurrë me vërtetësinë e lajmit. Nuk jemi as perfektë dhe as të pagabueshëm. Nuk kemi për qëllim as të ndihmojmë njërën palë apo të dëmtojmë një palë tjetër. Jo, qëllim ynë ka qenë dhe mbetet vetëm raportimi me saktësi i ngjarjeve që ndodhin, sado të pëlqyeshme ose jo të jenë ato për personazhet apo protagonistët e që mund të jenë të përfshirë.