Milan në krizë totale, UEFA e fut në panik
Reagojnë nga Nioni: Nuk ka ende asnjë vendim zyrtar
Mediat italiane publikuan të parat lajmin se dosja e Milanit nuk e ka kaluar testin në zyrat e Nionit. Ky refuzim i UEFA-s, megjithëse ende jo i zyrtarizuar, do të ishte një tjetër shuplakë për Milanin, jo vetëm për të ardhmen e klubit, por edhe për dyshimet që karakterizojnë pronarët kinezë. Mospranimi në zyrat e Nionit i projektit prej 150 faqesh, është vetëm pika që mbush vazon, pasi tashmë Fasone dhe drejtuesit e tjerë duhet të gjejnë rrugë të reja për rimëkëmbjen e klubit kuqezi.
RRUGËDALJET - Në rast refuzimi, UEFA mund t'u japë kuqezinjve dy rrugë:
1- Mund të jetë kalimi nga një "marrëveshje vullnetare", në një "marrëveshje për t'u rishqyrtuar", çka parashikon një tjetër analizë në janar 2018 nga ana e UEFA-s, me Milanin që duhet të paraqesë një plan të ri dhe me profil edhe më të ulët. Aktualisht, Interi dhe Roma gëzojnë të tilla marrëveshje, por krahasuar me zgjidhjen e parë, zgjidhja e dytë kufizon lirinë në merkato.
2- Mundësia e dytë përfshin një shtyrje të gjykimit nga ana e UEFA-s, me Milanin që mund ta gjente veten duke humbur shumë kohë të çmuar dhe pa sigurinë e një përkrahjeje politike nga ana e institucionit kryesor të futbollit europian.
RREZIQET - Megjithëse në momentin që dosja kuqezi u dorëzua, krerët ishin optimistë, shpeshherë është përmendur edhe hipoteza e "ngeljes" në testin institucional. Administratori Fasone ka shpjeguar që Milani ka plane rezervë, por në pritje të tyre, klubit italian i kanosen disa rreziqe:
a. Tërheqje vëmendje - Në të tilla raste, UEFA e nis me një tërheqje vëmendje të klubit.
b. Në rast se klubi nuk reagon ndaj sanksionit të parë, merr edhe një shkresë paralajmëruese.
c. Kur inspektorët që monitorojnë ecurinë e klubit vënë re mangësi, atëherë UEFA gjobit klubin shkelës.
d. Nëse klubi vazhdon të zvarrisë projektin, UEFA e penalizon me pikë.
e. Në rast se UEFA vëren shkelje të marrëveshjes së saj me klubin, ky i fundit mund të gjobitet deri në miliona euro.
f. Një tjetër sanksion mund të jetë përjashtimit nga kompeticionet europiane për një
ose disa sezone.
g. Pengesa e zhvillimit të merkatos ose federimi i lojtarëve janë të tjera rreziqe që u kanosen klubeve shkelëse të normativave UEFA.
h. Për klubet që bëjnë shkelje të rënda, UEFA arrin deri aty sa t'u heqë tituj për
t'i penalizuar.
UEFA - Me krerët e Milanit, që vijonin betejën mediatike me të gjitha agjencitë e lajmeve, vetë UEFA, nëpërmjet një komunikate për shtyp, ka përgënjeshtruar çdo lajm në lidhje me vendimin e saj për Milanin. Sa u përket kuqezinjve,
institucioni më i lartë futbollistik europian ka thënë: "Çdo lajm i publikuar në lidhje me vendimin për projektin e Milanit, është i pabazë. Komisioni për kontrollin financiar do të mblidhet të premten (sot), ndërsa vendimi do të jepet javën e ardhshme."