Shehi: Keqardhje për pikët e lëna, ja çfarë kërkova për sfidën e fundit
Kapiteni: Do ruaj dorezat dhe fanellën e Europës
Edhe një herë tjetër e ka bërë me dije që do i japë fund me Skënderbeun në përfundim të edicionit. Orges Shehi e ka përsëritur sërish në mikrofonin e "TVSH"- së se kjo ishte sfida e tij e fundit në Europë dhe se në verë do ta mbyllë karrierën, duke zbuluar edhe kërkesat për bashkëlojtarët në dhomat e zhveshjes si dhe ndjesinë për humbjen.
HUMBJA - "Sinqerisht të vjen keq për rezultatin, sepse nga ana tjetër ne kemi luajtur mirë dhe të barabartë si në vazhdimësinë e ndeshjeve të tjera. Kur ndëshkohesh, në fund, të vjen keq dhe qan pikën e humbur."
NOTA PËR EKIPIN - "Paraqitjen e këtij viti në Europë mund ta cilësoj si kampionat, pasi e kemi nisur herët. Kemi bërë 14 ndeshjen në një periudhë të shkurtër. Jemi të kënaqur nga performanca e ekipit sepse jemi shfaqur mirë. Lojtarët luajnë pa asnjë ndjenjë inferioriteti me kundërshtarët. Të kënaqur nga ajo që kemi marrë dhe kemi dhënë."
E FUNDIT - "Para ndeshjes, po ju thosha djemve që ta mbyll me një paraqitje dinjitoze. E kam thënë që, fundi do të jetë në verë, por duhet të përqendrohemi deri në fund për kampionatin dhe të dalim me kokën lart nga Europa. Dorezat dhe fanellën do t'i mbaj, pasi po dalim nga një kompeticion shumë i rëndësishëm. Ne kemi luajtur për herë të dytë, por ky edicion është për të lënë shenjë sepse kemi dalë më kokën lart dhe jemi shfaqur mirë." ARBITRI - "Unë personalisht nuk jam marrë me arbitrat as në Shqipëri dhe as në të tilla kompeticione. Ndoshta mund të pretendonim diçka më shumë, por nga pozicioni im nuk kisha pamje. Djemtë më thanë që kishte moment për penallti dhe një i dyshimtë. Nuk është në karakterin tim që të merrem me arbitrin." FUNDI - "Nga pozicioni dhe eksperienca me shumë ndeshje ndërkombëtare dhe vite mbi supe, doja të ishim të qetë dhe këtë gjë t'ia përcillja skuadrës. Kur luan në të tilla kompeticione, me kundërshtarë shumë të fortë, në fund tensioni është prezent, duke qenë se je në kërkim të rezultatit. Ndoshta mund ta çonim lojën pak më ndryshe, por i tillë është futbolli që na ndëshkoi. I tillë moment më kujton edhe Dinamon, që na bëri të pësojmë gol në fund fare", deklaroi kapiteni Shehi.