“Receta” e Brahos: Ja çfarë i duhet Luftëtarit për të shpëtuar
Sipas "Mjeshtrit të Merituar", bluzinjtë mbijetojnë
Për "Mjeshtrin e Merituar të Sportit" Sefedin Braho, i vetmi lojtar gjirokastrit që në karrierën e tij sportive është vlerësuar me këtë titull, Luftëtari kurrsesi s'e meriton të jetë në zonën "e ftohtë". Në intervistën e tij për "Panorama Sport", lidhur me ecurinë e gjirokastritëve në 13 javët e luajtura, për domosdoshmërinë e ndërhyrjes në merkato, mjeshtri Braho u shpreh: "Luftëtari, nisur nga rezultatet aktuale, nuk është ai i pritshmi. Përgjegjës konkret jo vetëm që s'ka, përderisa gjykimet e njëanshme kanë rezultuar kundër lojës që futbollistët kanë shpalosur në fushë. Jo vetëm kaq, por edhe mungesa e përqendrimit në momentet decizive në mbrojtje, si dhe 'hallakatja' në sulm, kanë bërë që Luftëtari të humb shkëlqimin e sezonit të shkuar në renditje, por kurrsesi në nivelin e lojës së treguar ndaj gjithë kundërshtarëve". Përballja e javës së 14-të, ajo me Kamzën konsiderohet më shumë se jetike për misionin mbijetesë të Luftëtarit, nisur nga gara e fortë sportive që mbart sezoni futbollistik 2017-2018. Me optikën e "magjistarit" të futbollit gjirokastrit, Luftëtari falë investimeve të presidencës, të kryesuar nga Grigor Tavo, do të jetë sërish pjesë e ekipeve elitare në fund të sezonit. "Në një garë të gjatë dhe me 'thika pas shpine' ka vështirësi në menaxhim. Në shumë takime, ashtu si dhe sezonin e fundit jemi penalizuar nga gjykimet. Nuk mund të them se kanë qenë tendencioze, por të mohosh penallti flagrante, këtu është vendi për t'u ndalur", vijoi Sefedin Braho. MERKATO - Megjithëse zyrtarisht merkatoja dimërore nuk ka startuar, për Brahon është koha që në vigjilje të saj, drejtuesit bluzinj të menaxhojnë si hyrjet dhe daljet nga ekipi. "Luftëtari i ka potencialet e duhura për të rivalizuar denjësisht në këtë kompeticion futbollistik. Asgjë nuk do të mjaftonte, kur ekipe si Kamza, Laçi dhe ndonjë tjetër do të përfaqësoheshin në këtë nivel. Drejtuesit e Luftëtarit do të bënin mirë që në merkaton e dimrit të afronin lojtarë cilësorë në të gjitha repartet. Vetëm kështu Luftëtari do të mbetet mes ekipeve më të mira në Kategorinë Superiore", përfundoi Braho. Gjirokastritët vijojnë përgatitjet për Kamzën, por lajmi i mirë është bashkimi me grupin i të lënduarve, Beqiri, Bregu, Toledo dhe Aleksi. Rikthimi i Vangjel Zguro pas skualifikimit dhe rikuperimi në kohë i të dëmtuarve do të thotë se Luftëtari është i plotë për Kamzën. Tomor Shehu