Besëlidhja, start zhgënjyes
Kapiteni Dibra: Të korrigjojmë gabimet, jam bërë tifoz me këtë ekip
Besëlidhja vijon stër vitjen në kuadër të javës së dhjetë të kampionatit për të rikuperuar energjitë për transfertën e së shtunës, që do të luhet në Pukë ndaj Tërbunit. Në ndeshjet jashtë fushe, lezhjanët kanë fituar vetëm një, kanë barazuar po një dhe kanë humbur dy deri tani. Objektivat, që i ka vënë vetes skuadra lezhjane, nuk e lejojnë që të gabojë, madje as në transferta, pasi është 8 pikë larg kreut, pozicion që duhet ta arrijë sa më shpejt të jetë e mundur. Duke shfrytëzuar shtyrjen e kampionatit për një javë, Besëlidhja punoi me intensitet në ato sektorë dhe me ata individë që deri tani kanë shfaqur mangësi,
duke punuar në mënyrë të diferencuar dhe kjo mendohet nga stafi teknik se do ta ketë pozitivitetin e saj. DIBRA
Kapiteni i Besëlidhjes, Kledi Dibra, që po luan sezonin e shtatë me fanellën e saj, në një prononcim për gazetën "Panorama Sport", shprehet: "Eksperienca ime me fanellën e Besëlidhjes është shumë e gjatë, që në hapat e para të mia si futbollist profesionist, që kur kam dalë nga Akademia e Vllaznisë, ndaj jam bërë edhe tifoz i saj. Ajo çfarë ka kaluar, le të na shërbejë për analizë që të mos përsëritet më. Tani duhet që të shikojmë vetëm përpara. Objektivat tona tashmë dihen, pasi pasha e fanellës së Besëlidhjes është e rëndë, ndaj na duhet shumë punë e përpjekje që ta lehtësojmë rrugën për rikthimin e saj mes më të mirave të elitës së futbollit tonë. Tani po mendojmë për transfertën e radhës që do të luhet të shtunën në Pukë ndaj Tërbunit, një sfidë e vështirë, që klasifikohet ndër të vështirat, por jo e pamundur për ne për të marrë atë që meritojmë. Kundërshtari i radhës ka shumë futbollistë, me të cilët kam luajtur shumë me ta këtu te Besëlidhja, ndaj na duhet shumë punë për ta neutralizuar lojën e tyre për ta kthyer në favorin tonë. Gjithsesi, kjo është puna jonë, të luajmë fort, pastër, me shpirt gare dhe jam i bindur se kjo do të na shpërblehet në arenën e blertë me rezultat pozitiv", theksoi kapiteni i Besëlidhjes, mbrojtësi shkodran Kledi Dibra. Skuadra lezhjane synon ngjitjen në Superiore, por duket se këtë sezon do ta ketë të vështirë.