Themelohet Shoqata Dinamo, Ilir Trebicka president

Emri i madh Dinamo, turbina që prodhon energji, do të kthehet sërish në arenën e lojërave me dorë. Dje, një grup ish-basketbollistësh të klubit legjendar të Dinamos kanë krijuar Shoqatën e Basketbollit Dinamo, duke zyrtarizuar të gjitha përpjekjet e tyre për të rikrijuar klubin e munguar në arenën e basketbollit shqiptar. Kështu emri i madh i Dinamos do të kthehet sërish aty ku i takon, në arenën e basketbollit shqiptar, me një qëllim shumë të thjeshtë dhe po aq kuptimplotë: të ringrejë traditën e mrekullueshme të klubit Dinamo, për të prodhuar lojtarë nga brezi i ri, të cilët do t'i shërbejnë rritjes së nivelit të basketbollit shqiptar. Aktivitetet do të nisin që nesër me grupmoshat U-10, U-12 dhe U-14, pranë palestrës te shkolla "Mikel Dardani". Për të zyrtarizuar themelimin e kësaj shoqate, ishin mbledhur figura të shquara të basketbollit dinamovit, ku presidenti i kësaj shoqate mbajti dhe një fjalim përpara të pranishmëve: "Kam kënaqësinë dhe nderin që të deklaroj para jush krijimin e Shoqatës Dinamo Basket, si përfaqësuese e vetme e basketbollit dinamovit të gjithë brezave. Kjo shoqatë është jo fitimprurëse dhe e regjistruar në Gjykatën e Tiranës dhe QKR. Ideja për ta krijuar këtë shoqatë ka lindur midis nesh, ish-lojtarëve të këtij klubi, që përfaqësojmë dy gjenerata legjendash ndër vite. Këtë ide ne nuk ia kemi kërkuar njëritjetrit, ajo ka lindur me mirëkuptimin simbolik midis nesh. Ndërkaq, grupi iniciator i krijimit të kësaj shoqate është plotësisht i bindur se kjo iniciativë e jona do të shprehë dëshirën e të gjithë ishbasketbollistëve dinamovitë ndër vite. Me këtë rast bëjmë me dije, pa asnjë dallim, se kjo shoqatë do të jetë e hapur për këdo ish-basketbollist apo ish-trajner edhe drejtues të klubit Dinamo. Ja dhe struktura e Shoqatës: Spiro Shano, Ilir Trebicka, Ilir Gavoçi, Alfred Rusho, Olsi Rama. Në mbledhjen e parë të kësaj shoqate, president u zgjodh Ilir Trebicka, ndërsa drejtor ekzekutiv u zgjodh nga Këshilli Drejtues Eduart Çarçani.