Lushnja turpëron Kukësin, Gjici mban Milinkoviçin
Mbledhje urgjente me lojtarët, zbardhen prapaskenat pas humbjes
Për të parë një Kukës që pëson tre gola si pritës, duhet rikthyer vëmendja pas, në ndeshjet kualifikuese të Europa Ligës kundër Austrisë së Vjenës, në korrik 2016 ( 1- 4) apo ndaj Legias së Varshavës (0-3), në korrik 2015. Mirëpo, duke qenë se "Zeqir Ymeri" nuk është i mjaftueshëm për Europën, tre gola të pësuar në këtë impiant për herë të fundit janë regjistruar në vitin 2013, në 14 shtator. Ka qenë Vllaznia që i ka shkaktuar këtë humbje dramatike Kukësit, mirëpo, Lushnja e Hysen Dedjas ia rikthen më aktuale se kurrë makthet e ngjashme. Në fillim, Prençi jep shijen e fitores në fraksionin e parë dhe më pas, dopieta e kapitenit Sefa zhvlerëson barazimin e përkohshëm të Bakajt. Gabime amatore në mbrojtje, ku i fundi i vë vulën te Kukësi për situatën kaotike që po kalon ekipi, ndërsa për Lushnjën është një trepikësh i artë. Fitore që i rikthen besimin në garën për mbijetesë dhe dridh jo pak Luftëtarin e Vllazninë që tashmë duhet të bëjnë llogaritë për tre në lidhje me rënien…
SHKËNDIJA - Moti i ftohtë dhe situata edhe më e ftohtë e Kukësit në krahasim me skuadrën që kryeson kampionatin, e vë jo pak në presion ekipin e Milinkoviçit. Si të mos mjaftonin këta faktorë, por edhe mungesat në formacion, është edhe Lushnja që qetësisht shënon dhe nis festën në sytë e të pranishmëve të pakët në "Zeqir Ymeri". Një krosim i Metos shfrytëzohet nga Prençi, i cili shfrytëzon vëmendjen e kushtuar të qendërmbrojtësve për shtatlartin Sefa, vjen nga pas dhe në qendër të zonës devijon sferën drejt rrjetës.
INSISTIMI - Fraksioni i parë i lojës për Kukësin luhet i gjithi në tentativë për të gjetur golin e baraspeshës. Është Bakaj dhe Guri që tentojnë disa herë me goditje, por porta e Spahos shpëton pa pësuar. Nuk mjafton as ndihmesa e shtatlartit Shameti apo as Alijev për të ndryshuar rezultatin. Një pretendim i vendësve për 11-metërsh mbyll tentativat pa fund të Kukësit për të barazuar, por Lushnja e mbyll në avantazh dhe trajneri Ndreu duhet të këshillojë të tijtë si ta ruajnë rezultatin e arritur...
SHPRESA - Kryegolashënuesi i Kukësit i vjen edhe një herë në ndihmë ekipit verilindor. Elis Bakaj nuk gabon brenda në zonës dhe i rikthen qetësinë Kukësit në minutën e 48- të. Nisja më e mirë e mundshme për vendësit që shtyjnë drejt sulmit për t'iu imponuar lushnjarëve.
HEROI - Një mision i vështirë ka gjithmonë nevojë për heronj. Për njerëz që të ngrihen mbi të gjithë për të udhëhequr dhe për t'i dhënë jetë besimit se gjithçka mund të bëhet e vërtetë. Fation Sefa është njeriu i ndeshjes. Sulmuesi bën "vrasësin"! Një pasim i Gavës me devijim
perfekt të Pepës në të 66-ën gjen kapitenin në pozicion, i cili e dërgon sferën në këndin e pamundur të Koliçit. Lushnja në ekstazë, por asgjë nuk ka mbaruar. Heroi Sefa ka ende një perlë. Ishte Peposhi e Shtubina që provuan disa herë, por sfera nuk u bind për
të gjetur kuadratin.
SHPËRTHIMI - Atë që nuk e bëjnë dot vendësit e ekipit kampion në fuqi, e bën për të dytën herë kapiteni i Lushnjës. Në të 88-ën, tentativat e Kukësit marrin fund me një "nokaut" nga Lushnja. Një mosmarrëveshje e Shametit
me Hoxhën i jep një "asist" Sefës që e ka të thjeshtë të shënojë edhe pas daljes së Koliçit. Kukësi pëson tre gola në "Zeqir Ymeri" dhe në fund, tifozët vendës brohorasin emrin e Lushnjës, të cilën e përcjellin me duartrokitje. Kampionët në fuqi... me kokën
poshtë nga një sfidë "e turpshme", siç e cilësoi trajneri Milinkoviç në përfundim. Shpërthimi i Lushnjës në transfertë e bën që të shkojë në kuotën e tetë pikëve, dy më pak sesa Luftëtari i vendit të nëntë duke rihapur edhe një herë garën për mbijetesë.