Humbja, Gjici i jep edhe një shans Milinkoviçit
Shfryn serbi: Ishim për turp! U bënë gabime amatoreske
Pas humbjes shokuese që Kukësi pësoi në "Zeqir Ymeri", e cila u shoqërua me tension në dhomat e zhveshjeve, gazeta zbulon se presidenti Gjici ka thirrur urgjent në një takim kokë më kokë trajnerin Milinkoviç.
TAKIMI - Trajneri Milinkoviç ka munguar në mbledhjen e skuadrës direkt pas ndeshjes në dhomat e zhveshjes, por është paraqitur në mbledhjen me presidentin Gjici në mbrëmje. Sapo autobusi i klubit ka mbërritur në Tiranë, trajneri dhe përkthyesi i tij kanë shkuar direkt dhe janë parë te njëri prej bizneseve të presidentit Gjici afër Parlamentit. Takimi ka zgjatur rreth një orë e gjysmë, ku tekniku serb ka dhënë llogari për humbjen e rëndë. Gazeta mëson se palët kanë shqyrtuar të gjitha variantet më të mira për palët, por në fund presidenti dhe trajneri kanë rënë dakord që ky i fundit të vazhdojë aventurën e tij te Kukësi, të paktën përkohësisht. Pas kësaj dakordësie mes trajnerit dhe presidentit, pritet që sot të ketë një analizë të detajuar me stafin dhe të gjithë futbollistët.
DEKLARATA - Ka pranuar se lojtarët e tij kanë bërë gabime amatoreske, por ka thënë që ata u përpoqën deri në fund. Jo vetëm kaq, por në deklaratën që Mlladen Milinkoviç bëri për "Gol pas goli", tha se ekipi ishte për turp në këtë 90- minutësh. Trajneri i Kukësit pranoi se skuadra mund ta kalojë këtë situatë...
A keni besimin e grupit dhe të klubit për të vazhduar?
Besoj që lojtarët u përpoqën, u munduan. Kukësi mund të dalë nga situata. Mirëpo, lojtarët bënë gabime amatore dhe nuk e kuptoj dot si ndodhën. U përpoqën, por në fund dolëm pa pikë.
A besoni se mund të vazhdoni?
Unë e kam mendimin tim dhe e kam marrë një vendim.
Do të flas me presidentin. Për mua është turp kjo humbje, por fillimisht do komunikoj me presidentin.
I tradhtuar apo i zhgënjyer?
Nuk besoj se më ka tradhtuar njeri. Thjesht jam i zhgënjyer nga rezultati i ndeshjes.
Çfarë ndodh me Kukësin, çfarë problemesh ka që pëson
tre gola?
Kur humbet, ka shumë arsye dhe shumë shkaqe. Edhe tre golat e pësuar i patë vetë, s'është nevoja që t'i komentoj.
Pse nuk vihen në zbatim idetë tuaja, çfarë i mungon Kukësit?
Ju jeni trajner vetë dhe i kuptoni shumë mirë këto gjëra. I pari që mban përgjegjësi
kur nuk ka rezultate, është trajneri. Janë shumë gjëra të tjera dhe besoja se pas katër muajsh, do të transmetoja filozofinë time tek ekipi. Nuk ndodhi dhe këtë gjë po e vuajmë. Edhe në jetë, edhe në karrierë e kam mbajtur unë përgjegjësinë i pari kur gjërat nuk kanë shkuar mirë. Në të kundërt, në sukses nuk kam
marrë lëvdatat. Pa dashur t'i marr meritat Lushnjës, ishte ndeshje e turpshme për ne.
A mendoni se ia vlen të qëndroni te Kukësi?
Shpresoj që presidenti të marrë një vendim për ekipin. Unë e kam marrë vendimin tim dhe e di se çfarë do t'i them, por uroj që ai të marrë vendimin e duhur për ekipin.