Kastrioti “arratiset” në krye
Lamptej i miqve përfundon në spital, nuk përballon dot të ftohtin në 10 minutat e fundit
Kastrioti vazhdon të kryesojë bind shëm Grupin A të Kategorisë së Parë. Krutanët e nisin fazën e dytë me një tjetër fitore, ndonëse minimale, ajo vlen tri pikë. Skuadra e Samuel Nikajt mbetet e pamposhtur edhe pas 10-të javëve kampionat. Në sfidën e djeshme ndaj Burrelit, golin e vetëm të takimit e shënoi sulmuesi Taulant Marku, ndërsa Kabiru humbi një penallti. Me këtë 3-pikësh, Kastrioti vazhdon të jetë në krye të grupit me 26 pikë.
NDESHJA
Edhe në Krujë, moti nuk ka qenë aspak i mirë dhe i gjithë 90- minutëshi i ndeshjes është zhvilluar nën reshjet e shiut. Sa i takon ndeshjes, ajo nis me një rast shumë të mirë për vendësit, ku Lilaj del tek për tek me portierin mik, e shmang, por çuditërisht anësori jep pozicion jashtë loje. Krutanët janë më kërkues, Çutra pason për Markun, ky i fundit tenton, por pret Hila. Kastrioti rrezikon herë pas here, por miqtë mbrohen mirë. Në të 33-ën ka një prekje të topit me dorë dhe ekzekutimin e penalltisë për vendësit e merr përsipër Kabiru që godet, por topi përplaset në shtyllë dhe përfundon jashtë. Katër minuta më vonë, Mziu kroson në
zonë dhe Marku arrin të zhbllokojë shifrat. Miqtë janë inekzistentë në fushë dhe, madje, as nuk arrijnë të kalojnë në gjysmëfushën e vendësve në fraksionin e parë, i cili mbyllet me rezultatin 1- 0. Në pjesën e dytë skuadra e Nikajt vetëm
mundohet të mbrojë rezultatin, ndërsa reshjet e dendura nuk lejojnë zhvillimin normal të lojës. Megjithatë, Çutra dhe Malindi e tentojnë portën mike me goditje nga distanca, por pa arritur të shënojnë. Me këtë fitore, Kastrioti vazhdon të kryesojë
bindshëm grupin A dhe, aktualisht, duke qenë se ndeshja Tërbuni- Besëlidhja nuk është zhvilluar, skuadra e Nikajt e sheh veten në krye me 11 pikë diferencë.
E RRALLË
Në minutën e 80-të, lojtari nigerian i Burrelit, Lamptej
është ndjerë keq për shkak të temperaturave shumë të ulta. Futbollisti nuk ka arritur ta përballojë sfidën deri në fund dhe është dashur të transportohet drejt spitalit. Në këtë mënyrë, matjanët kanë mbetur me dhjetë futbollistë në 10 minutat e fundit
pasi nuk kanë pasur më zëvendësime. Diçka e rrallë që ndodh në ndeshjet në Shqipëri. Ndërsa, lojtari nigerian e ka të vështirë që të ambientohet me temperaturat shumë të ulta dhe të ftohtin që mbizotëron në vendin tonë gjatë dimrit.