Egnatian e ngrohin statistikat, Gjonaj beson te surpriza
Me seancën e paradites së djeshme, Egnatia u dha dorën e fundit përgatitjeve për prag sfidën me Vllazninë B që do të luajë sot në Shkodër. Gjatë të gjithë javës, grupi i lojtarëve ka punuar në çdo drejtim duke marrë ngarkesat e duhura fizike e teorike. Rrogozhinasit do të tentojnë surprizën sot në Shkodër dhe për të siguruar pikët e plota. Të dyja skuadrat janë ndeshur më parë dhe Egnatia ruan një bilanc pozitiv sa i përket statistikave. Për përballjen e sotme, trajneri Gjonaj do t'i ketë në dispozicion të gjithë lojtarët, pasi periudha e pushimit bëri që të rikuperohen edhe të dëmtuarit. Për "Panorama Sport", trajneri Vladimir Gjonaj u shpreh se ka besim te grupi që drejton dhe do ta nisin mbarë fazën e dytë. "Për ne, e rëndësishme që të japim maksimumin në çdo fushë. Duke treguar një futboll të bukur dhe më pas pikët bëhen më të lehta për t'i siguruar. Pas mbylljes me sukses të fazës së parë, në të dytën na mbetet "detyrë" të tentojmë të jemi sa më pranë kreut të renditjes. Kemi punuar gjatë seancave për korrigjimin e çdo gabimi që është vënë re më parë, pasi koha ishte e mjaftueshme që për sfidën me Vllazninë B të jemi më të saktë në veprime. Kam besim te grupi që drejtoj se edhe në Shkodër do arrijmë të bëjmë surprizën e radhës në transfertë, ashtu si ndeshjet e kaluara. Grupin e lojtarëve e kam të plotë dhe të gatshëm", përfundoi Gjonaj. Aldo Buzi Në portë: Sherri;
Në mbrojtje: Hysenaj, Ruqi, Pusi, Bega;
Në mesfushë: Markolaj, Kushi, Djepaxhia, Miloti;
Në sulm: Balaj, Ekorçeviç;
Trajner: E.Kraja; Skema: 4-4-2;
Në portë: Haremi
Në mbrojtje: Rexhepi, Nako, Vogli, Bakiasi;
Në mesfushë: Gjoka, Baze, Henry, Dosti, Brajt; Në sulm: Osinaki; Trajner: V. Gjonaj; Skema: 4-2-3-1;